Përmbytjet në Shkodër fatkeqësi natyrore, apo njerëzore?

A janë vërtet përmbytjet në Shkodër një fatkeqësi natyrore, apo njerëzore? Kjo është e vetmja pyetje që kërkon përgjigje të drejtë në mënyrë që opinioni të kuptojë qartë ngjarjen dhe pasojat e saj. Përmbytjet ujore në Shkodër dhe rrethinën e saj në fillim kishin nisur me lëshimin e tepricës së ujit nga hidrocentralet e Fierzës, Komanit dhe Vahut, për të vazhduar me pas me shiun që binte pa ndërprerë për disa ditë. Për dhjetë ditë të derdhjes së ujit nga këto hidrocentrale, si pasojë kishte rreth 10 mijë hektarë tokë të përmbytur, rreth 9 mijë banorë të evakuuar nga shtëpitë e tyre, rreth 5000 shtëpi të përmbytura, dëme të mëdha në të mbjella, por edhe dëme tjera të konsiderueshme materiale e njerëzore.

Sipas banorëve të këtyre zonave të përmbytura kjo katastrofë kishte ardhur si pasojë e menaxhimit të keq të këtyre hidrocentraleve nga Qeveria shqiptare, e cila kishte lejuar që për disa muaj rresht të grumbullojë ujin në këta liqeje dhe kur tani ishte keqësuar moti kishte marrë vendim që të hapë portat e tyre për zbrazjen e ujit dhe kështu filloi ky dëm i madh kombëtar.

Qeveria shqiptare kishte deklaruar se kjo fatkeqësi kishte ardhur si pasojë e të reshurave të mëdha të shiut dhe se kjo ishte një gjë e paevitueshme. Hipokrizia e saj shkon deri aty sa të deklaroj se në këtë vend është parashikuar nga perëndia (Zoti) që çdo 100 vjet të ndodhin katastrofa të tilla, të cilat nuk mund të ndalen.

Po ashtu, kjo Qeveri ishte zotuar se do t’i paguaj të gjitha dëmet e shkaktuar dhe sipas disa vlerësimeve jo formale dëmet e deritashme mund të llogariten deri në 200 milionë euro. Kurse, për këtë qëllim kjo Qeveri në arkën e shtetit kishte rezervuar vetëm 17 milionë euro. Tani shtrohet pyetja ku do të merren rreth 183 milionë euro, kur dihet se ky vend ka një buxhet të varfër financiar?

Mirëpo, problemi nuk qëndron vetëm në shpjegimin e deklaratave të Qeverisë shqiptare, përshkrimin dhe konstatimin e kësaj katastrofe kombëtare, por kërkimin dhe ndëshkimin e shkaktarëve të vërtet të saj. Kjo katastrofë duhet shtruar në aspektin më të gjerë të përgjegjësisë kombëtare dhe të konstatohet drejtë se a ishte vërtet kjo katastrofë natyrore, apo e shkaktuar edhe njëherë nga faktori subjektiv?

Si mund t’i shpjegohet opinionit të gjerë që kësaj Qeverie, përkatësisht këtij kryeministri një kohë të gjatë po i ndodhin kataklizmi me pasoja të mëdha për vendin? Vallë, si të shpjegohet kjo që vetëm gjatë mandatit të Sali Berishës po ndodhin kriza të mëdha kombëtare? A mos këtë njeri e ka kap “Syri i Satanit” (Shejtanit) dhe tani nuk po mund të lirohet prej tij?

Njeriu normal në këto raste s’ka si të mos futet në dilema dhe të mendoj, se a mos ky njeri përfundimisht jeton në botën satanike dhe nuk mund të dalë deri sa të shkatërrojë plotësisht këtë vend dhe këtë popull?

Padyshim, argumentet janë të shumta për shtruarjen e dilemave të tilla. Për shembull, si të shpjegohet fakti i formimit të piramidave dhe leckosja përfundimtare e institucioneve shtetërore shqiptare gjatë viti 1991? A ishte kjo një tragjedi e krijuar nga natyra, apo nga dora e njeriut?

Si të shpjegohen ngjarjet e vitit 1997, shpërthimi i depove të armëve dhe katandisja totale e shtetit, e lënë në mëshirën e bandave dhe dreqit të mallkuar? A kishte karakter natyror, apo njerëzor kjo ngjarje? Sa për ilustrim, në periudhën 50 vjeçare të diktaturës komuniste ishin vrarë rreth 5000 njerëz të pafajshëm, ndërsa vetëm për disa ditë gjatë të së ashtuquajturës demokraci ishin vrarë rreth 3000 shqiptarë të pafajshëm. Kjo nuk kishte ardhur si pasojë e natyrës, por nga dora e njeriut.

Më tej, si mund t’u shpjegohet shqiptarëve diferencimi ndër shqiptar, dallimi i tyre në të kuq dhe blu, në krahina dhe nahi, në fise dhe grupe të ndryshme të interesit, ose si të zbërthehet deklarata e tij e famshme se shqiptarët duhet të kthehen te Kanuni i Lekë Dukagjinit (mesjetës)?

Më pastaj, si të shpjegohet biznesi i tij i pistë i furnizimit me naftë për serbët gjatë periudhës së luftës në Bosnjë dhe Kroaci, atëherë kur e gjithë bota kishte vënë sanksione ndaj fashizmit serb ky furnizonte me karburante ushtrinë gjenocidiale serbe?

Si të shpjegohet biznesi i tij “patriotik” me mafinë serbe si: Damir Fazliç, Vuk Hamoviç, Vojin Lazareviq dhe viça tjerë, të cilët dihet botërisht janë armiq të kombit shqiptar. Damir Fazliç është nipi i Jovica Stanishiçit, shefit të UDB-së jugosllave, i cili sot e kësaj dite është duke dhënë llogari për krime lufte kundër shqiptarëve të Kosovës në Hagë. A është kjo fatkeqësi e Zotit, apo fatkeqësi njerëzore?

Pse në kohën e Sali Berishës dhe kompanisë së tij ndodhi kataklizmi i Gërdecit, me ç’rast humbën jetën mbi 26 shqiptarë dhe u shkaktua dëm i madh material? Kjo ngjarje kishte ndodhur mu në prag të futjes së Shqipërisë në NATO dhe kishte krijuar një imazh shumë të keq për vendin.

Çfarë po ndodh me tunelin e Kalimashit, askush nuk e dine? Projekti i këtij aksi rrugor kap shumën prej 1 miliardë euro. A janë destinuar të gjitha mjetet financiare në këtë projekt, apo janë vjedhur gjysma e tyre? Faktet tregojnë se këtu kishte manipulime të mëdha financiare dhe prapë tuneli është shembur dhe qëndron i mbyllur.

Më tej, si të shpjegohet marrëveshja detare me Greqinë, me ç’rast këtij shteti grabitqarë u është falur një hapësirë e konsiderueshme detare? Edhe kjo është fatkeqësi natyrore, apo fatkeqësi e Qeverisë së Sali Berishës?

Si të shpjegohet ftesa e Sali Berishës për presidentin serb Boris Tadiq që të vizitoj Tiranën pa kërkuar falje për krimet ndaj shqiptarëve të Kosovës dhe pa pranuar shtetin e Kosovës? Çfarë politike i thonë kësaj, kombëtare, apo tradhtare?

Në vazhdim, si gjykohet veprimi i tij për dhurimin e 400 mijë eurove për të ashtuquajturën komunën serbe të Graçanicës, ndërsa po këta serb asnjëherë deri më tani, asnjëri prej tyre nuk është penduar për të këqijat që i kanë shkaktuar 2 milionë shqiptarëve të Kosovës. Ose, si mund të shpjegohet shtrirja e dorëz ndaj serbëve, kur shteti i tyre kriminel në Luginë të Preshevës është duke gjykuar dhjetë të rinj shqiptar vetëm pse janë shqiptarë. Ose, si mund të ndihmohen serbët e Kosovës, kur shteti i tyre në Luginë të Preshevës diskriminon sistematikisht shqiptarët duke larguar nga puna rreth shtatë sish nga Gjykata komunale në Preshevë. A nuk mjaftojnë të gjitha këto argumente për të dhënë përgjigjen vetë shqiptarët se nga kush për 20 vjet të qeverisjes u janë shkaktuar fatkeqësitë e ndryshme, nga natyra (Zoti), apo nga Qeveria e Sali Berishës.

Përfundimisht, kjo skemë politike duhet të ndërrohet nga menaxhimi, sepse më shumë i kanë sjellë dëm se sa dobi këtij vendi. Por, jo vetëm kaq, për të gjitha të këqijat që u janë shkaktuar këtij vendi dhe popullit shqiptarë gjatë dy dekadave të fundit dikush duhet dhënë llogari, pa marrë parasysh a janë të kuq, apo blu. Ky vend duhet të udhëhiqet nga njerëz të aftë, të rinj, që kanë guxim, aftësi profesionale e kombëtare dhe me përgjegjësi të lartë. Ky do të ishte projekti përfundimit të gjitha të këqija ndaj këtij populli. Mjaftë më me eksperimente mbi kurriz të këtij populli, andaj shqiptarët duhet të ndryshojnë të ardhmen e tyre. Një mësim Biblik thotë: “Një popull që nuk ndryshon veten, Zoti nuk i ndihmon të ndryshojë atë”. Prandaj, Shqipërisë i duhen ndryshime rrënjësore demokratike në të gjitha sferat e jetës, sepse kjo është në të mirë të këtij vendi. Dashtë, Zoti që këtij populli kurrë të mos i përsëriten fatkeqësi të tilla. Zoti e bekoftë Shqipërinë dhe i ndihmoftë shqiptarëve!

•  
•