Grupet e afërta me Iranin në Irak edhe në ditën e dytë vazhdojnë protestat para ambasadës së Shteteteve të Bashkuara të Amerikës (SHBA) në Bagdad, raporton Anadolu Agency (AA).
Mbështetësit e forcës milice shiite Hashd al-Shaabi dhe Kataib Hezbollah edhe sot kanë vazhduar të mblidhen para ambasadës amerikane në Zonën e Gjelbër të kryeqytetit të vendit, Bagdad.
Për t’i shpërndarë protestuesit që brohorisin slogane antiamerikane, forcat e sigurisë kohë pas kohe hedhin gaz lotsjellës dhe shok-bomba.
Personat e ndikuar nga gazi me ambulanca transportohen nëpër spitalet përreth.
Përreth Zonës së Gjelbër vazhdojnë të merren masa të larta të sigurisë dhe nuk lejohet hyrja e askujt në zonë, përfshirë edhe gazetarët, përveç zyrtarëve qeveritarë dhe personave të afërt me Hashd al-Shaabi.
“Të anulohet marrëveshja e sigurisë me SHBA-në”
Ndërkohë, deputeti i Koalicionit shiit Fatah i afërm me Iranin, Saad Khazali, në një deklaratë për mediat lokale tha se në kuvend kanë filluar të mbledhin nënshkrime për anulimin e marrëveshjes strategjike për siguri të nënshkruar mes SHBA-së dhe Irakut.
“Do të punojmë me gjithë fuqinë tonë që të merret një vendim për nxjerrjen e forcave amerikane nga vendi”, tha ai.
Dje gjatë ditës, mijëra irakianë sulmuan kompleksin e ambasadës amerikane, duke protestuar kundër sulmeve ajrore të fundjavës në Irak dhe Siri kundër milicisë Kataib Hezbollah që la të paktën 25 luftëtarë të vrarë.
