Sulmet në rritje të talibanëve në gjithë Afganistanin kanë privuar të paktën 13 milionë njerëz në nevojë nga shërbimet themelore publike, tha një zyrtar, transmeton Anadolu Agency (AA).
Sipas Komisionit të Pavarur të Reformës Administrative dhe Shërbimit Civil të vendit, deri në 260 ndërtesa administrative publike janë shkatërruar në 160 rrethe të 29 provincave nga eksplozivë ose mjete të tjera.
Gjetjet nga komisioni më tej tregojnë se plaçkitje të pajisjeve dhe pasurive të institucioneve publike janë kryer në 82 rrethe që janë marrë nën kontroll së fundmi nga talibanët.
Kreu i Komisionit Nader Nadery tha në një konferencë për shtyp se rreth 13 milionë afganë janë privuar nga shërbimet themelore të qeverisë dhe projektet e zhvillimit, të tilla si rindërtimi i rrjeteve të furnizimit me ujë dhe ndërtimi i puseve për shkak të thatësirës, rrugëve, urave, shkollave dhe spitaleve.
“E gjithë kjo është vetëm si rezultat i marrjes së rajoneve nga talibanët”, tha ai.
Megjithatë, talibanët i hodhën poshtë këto pretendime.
Zëdhënësi i grupit Zabihullah Mujahid përmes një deklarate i quajti gjetjet si “propagandë mercenarësh”.
Ministria e Mbrojtjes e Afganistanit sot njoftoi se një total prej 193 kryengritës talibanë u vranë në operacione të ndryshme antiterroriste në gjithë vendin.
Komandanti i lartë ushtarak amerikan në Afganistan, gjenerali Scott Miller, dha dorëheqjen nga posti i tij të hënën pasi më shumë se 95 për qind e trupave amerikane kanë lënë vendin e shkatërruar nga lufta pas dy dekadave të angazhimit.
Me afrimin e afatit të tërheqjes së forcave amerikane nga Afganistani deri në shtator, Bagram Airfield, stacioni më i madh ushtarak amerikan në vend, u transferua te forcat afgane në fillim të këtij muaji.
Që kur Presidenti i SHBA-së Joe Biden njoftoi planin për tërheqje nga Afganistani në maj, talibanët kanë kapur mbi 150 rrethe në vend.
Nga ana tjetër, forcat afgane kanë pretenduar të kenë vrarë rreth 200 kryengritës në ofensivat antiterroriste në baza ditore. /aa
