Arabia Saudite ka pritur në Riad takimin e parë të një aleance globale për të nxitur një zgjidhje me dy shtete të konfliktit palestinezo-izraelit, transmeton Anadolu.
Ministri saudit i Punëve të Jashtme, Princi Faisal bin Farhan, e quajti takimin “hapin e parë midis disa hapave me pjesëmarrjen e 90 vendeve”.
Ai tha se mbretëria saudite “do të mobilizojë opinionin publik ndërkombëtar kundër praktikave të Izraelit ndaj popullit palestinez”.
“Krijimi i një shteti palestinez është kushti i mbretërisë për të ecur përpara me normalizimin me Izraelin”, tha bin Farhan.
Koalicioni global u nis nga Arabia Saudite në muajin shtator për të nxitur një zgjidhje me dy shtete për konfliktin izraelito-palestinez.
Të hënën, Autoriteti Palestinez shprehu shpresën se takimi i aleancës globale do të përforcojë përpjekjet për t’i dhënë fund pushtimit izraelit dhe për të krijuar një shtet palestinez.
Izraeli vazhdon me luftën shkatërruese në Rripin e Gazës që nga sulmi i Hamasit në tetor të vitit të kaluar, pavarësisht se Këshilli i Sigurimit i OKB-së bëri thirrje për një armëpushim të menjëhershëm.
Të paktën 43.100 palestinezë janë vrarë që atëherë, kryesisht gra dhe fëmijë, si dhe mbi 101.500 të tjerë janë plagosur. Sulmet izraelite gjithashtu kanë zhvendosur pothuajse të gjithë popullsinë e territorit mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për veprimet e tij në Gaza.
