Gjashtëmbëdhjetë civilë dhe personel sigurie u vranë në sulme nga “grupe të jashtëligjshme” në Sirinë jugore, thanë autoritetet, transmeton Anadolu.
Në një deklaratë, shefi i policisë rurale të Damaskut, Hussam al-Tahan, tha se grupe të armatosura sulmuan postet e sigurisë në periferi të Ashrafiyat Sahnayas, një qytet kryesisht i banuar nga komuniteti Druze, 12 kilometra larg qendrës së Damaskut.
Ai tha se 11 pjesëtarë sigurie ishin midis të vrarëve në sulme.
Tahan tha se përshkallëzimi pasoi trazirat në qytetin e afërt Jaramana, gjithashtu një zonë e komunitetit Druze, ku një marrëveshje e brishtë armëpushimi ishte ndërmjetësuar gjatë dy ditëve të fundit me udhëheqësit e komunitetit lokal.
Marrëveshja përfshinte ndalimin e të shtënave me armë dhe kthimin e trupave të të vrarëve në përleshjet e fundit. Autoritetet filluan zbatimin e kushteve menjëherë, tha ai.
“Megjithatë, grupet e jashtëligjshme infiltruan tokën bujqësore në Ashrafiyat Sahnaya të martën në mbrëmje dhe hapën zjarr si ndaj civilëve, ashtu edhe ndaj personelit të sigurisë, duke shkaktuar më shumë viktima”, shtoi ai.
