Grupet palestineze dhe Izraeli mbrëmë kanë arritur armëpushim në Rripin e Gazës pas tensioneve që zgjatën dy ditë, raporton Anadolu Agency (AA).
Sipas informatave të marra nga grupet palestineze, armëpushimi hyri në fuqi në ora 23:30 sipas kohës lokale.
Burimet nuk dhanë më shumë detaje.
Në ndërkohë, të paktën 8 palestinezë u plagosën në sulmet izraelite në Gaza, tha në një deklaratë zëdhënësi i Ministrisë së Shëndetësisë në Gaza, Ashraf al-Kudra.
Tensionet janë përshkallëzuar ndjeshëm në ditët e fundit mes Izraelit dhe grupeve të rezistencës me seli në Gaza, kur një palestinez u vra dhe tre të tjerë u plagosën nga të shtënat izraelite pranë gardhit të sigurisë së Gaza.
Avionët luftarakë izraelitë ndërmorën sulme ajrore ndaj pozicioneve të grupit palestinez Xhihadi Islamik në Siri dhe në Rripin e Gazës, duke vrarë dy aktivistë të grupit.
Ushtria izraelite më herët tha se 50 raketa u lëshuan nga Gaza drejt Izraelit, 90 për qind e të cilave u shkatërruan nga sistemi izraelit i mbrojtjes ajrore.