Sekretari i Përgjithshëm i OKB-së Antonio Guterres sot ka bërë thirrje për barazi vaksinash për të gjithë pasi numri i njerëzve që kanë vdekur nga koronavirusi ka kaluar 5 milionë në mbarë botën në më pak se dy vjet, transmeton Anadolu Agency (AA).
“Ne duhet të vazhdojmë të sigurojmë që të gjithë kudo të kenë akses në vaksinat dhe trajtimet e nevojshme urgjentisht”, tha Guterres në Twitter, duke përmendur situatën aktuale, pasi “bota jonë ka arritur një tjetër moment historik tragjik” me 5 milionë vdekje për shkak të COVID-19.
Ai nënvizoi se “vetëm së bashku” me solidaritet, bota do ta kapërcejë pandeminë COVID-19.
Numri i njerëzve që kanë vdekur nga koronavirusi ka kaluar në mbi 5 milionë në mbarë botën në më pak se dy vjet, sipas Universitetit Johns Hopkins.
Të dhënat e institucionit me bazë në SHBA treguan se më shumë se 246,8 milionë janë infektuar nga virusi që u shfaq në Kinë në dhjetor të vitit 2019 dhe që atëherë është përhapur në çdo cep të botës. /aa
