Kreu i Organizatës së Energjisë Atomike të Iranit, Mohammad Eslami, ka deklaruar se Agjencia Ndërkombëtare për Energjinë Atomike (IAEA) nuk ka të drejtë të inspektojë objektet bërthamore iraniane që janë goditur nga sulmet amerikane dhe izraelite në qershor.
Sipas agjencisë iraniane ISNA, Eslami tha se Irani ka lejuar inspektime vetëm në objektet që nuk janë prekur nga sulmet. Ai theksoi se duhet të ekzistojë fillimisht një protokoll i qartë për inspektimin e objekteve bërthamore të sulmuara.
Eslami kritikoi IAEA-n për mungesë reagimi ndaj sulmeve, duke thënë se një agjenci që nuk i dënon këto veprime nuk ka të drejtë të kërkojë inspektime. Ai akuzoi gjithashtu IAEA-n se ka dështuar në përgjegjësinë e saj dhe se drejtori i saj, Rafael Grossi, duhet të mbajë përgjegjësi.
Irani ka akuzuar më herët agjencinë se ka shpërndarë informacione të ndjeshme mbi objektet bërthamore tek Izraeli, ndërsa ka theksuar se presioni nga SHBA-ja, disa vende evropiane dhe Izraeli nuk do të ndikojë në qëndrimin e Teheranit.
Tensionet mes Iranit dhe SHBA-së janë rritur ndjeshëm pas luftës së qershorit, ndërsa bisedimet për programin bërthamor iranian mbeten të pezulluara. Teherani ka deklaruar se negociatat mund të rifillojnë vetëm nëse Uashingtoni jep garanci se procesi nuk do të pengohet sërish. /mesazhi
