Kongresi Amerikan është gati të shfuqizojë sanksionet e “Aktit të Cezarit” ndaj Sirisë, sipas një dokumenti që tregon dispozitën e përfshirë në Aktin e Autorizimit të Mbrojtjes Kombëtare për Vitin Fiskal 2026, transmeton Anadolu.
Legjislacioni do të heqë kufizimet e hartuara për të ndëshkuar regjimin e rrëzuar të Bashar al-Assadit për krime lufte.
“Akti i Mbrojtjes Civile të Cezarit në Siri i vitit 2019… shfuqizohet me anë të kësaj,” thuhet në draft dokument.
Projektligji kërkon miratim nga Dhoma e Përfaqësuesve përpara se të bëhet ligj.
Megjithatë, shfuqizimi do të kushtëzohet nga disa kërkesa.
Sipas dokumentit, presidenti amerikan duhet të raportojë në komisione të ndryshme të kongresit fillimisht brenda 90 ditëve, pastaj çdo 180 ditë për katër vjet, duke vërtetuar se Siria po ndërmerr hapa të prekshëm për të eliminuar DEASH-in dhe grupe të tjera terroriste, se të drejtat e pakicave respektohen, se vendi nuk po angazhohet në veprime ushtarake kundër fqinjëve, se po lufton pastrimin e parave dhe financimin e terrorizmit, se po ndjek penalisht krimet kundër njerëzimit të kryera nga regjimi i mëparshëm dhe po ndërmerr hapa për të luftuar prodhimin e drogës.
Nëse presidenti amerikan përcakton gjatë dy periudhave raportuese se këto kushte nuk po përmbushen, sanksionet mund të rivendosen në vend.
Dokumenti gjithashtu përfshin dispozita shtesë që lidhen me Sirinë.
Sipas një seksioni, Departamenti i Mbrojtjes i SHBA-së duhet t’i paraqesë raporte Kongresit mbi qendrat e paraburgimit të DEASH-it në Siri.
Për më tepër, Departamenti i Mbrojtjes, së bashku me Komandën Qendrore të SHBA-së, kërkohet të ofrojë një raport mbi statusin e konsolidimit të bazuar në kushte të pozicionit të forcave amerikane, vendndodhjeve të bazave dhe aktiviteteve në Siri.
