Ballina Lajmet Rajon dhe Botë Kryeministrja franceze: Të gjitha opsionet do të shqyrtohen për të rivendosur rendin

Kryeministrja franceze: Të gjitha opsionet do të shqyrtohen për të rivendosur rendin

Të gjitha opsionet, përfshirë gjendjen e jashtëzakonshme, do të shqyrtohen për të rivendosur ligjin dhe rendin në vazhdën e protestave pas vrasjes së një adoleshenti 17-vjeçar nga policia, tha kryeministrja franceze Elisabeth Borne, raporton Anadolu.

Borne u tha gazetarëve se qeveria do të shqyrtojë “të gjitha opsionet” me presidentin Emmanuel Macron, i cili do të mbajë një takim urgjent pasdite.

Më herët, gazeta “Le Figaro” raportoi se presidenti francez është i përgatitur të miratojë masa për rivendosjen e ligjit dhe rendit “pa tabu”. Gazeta tha se Macron u largua herët nga një samit i BE-së në Bruksel për t’u kthyer në Paris.

Presidenti pritet të informohet nga kryeministrja Borne dhe ministri i Brendshëm Gerald Darmanin mbi rekomandimet për të trajtuar situatën që u krijua pas vdekjes së Nahel M., i cili u qëllua për vdekje nga policia të martën në periferi të Parisit pasi, sipas prokurorëve, nuk iu bind urdhrit për ndalesë për shkelje në trafik.

Prokurorët thonë se oficeri që vrau adoleshentin është akuzuar për vrasje me dashje dhe është vendosur në paraburgim.

Më shumë se 800 persona janë arrestuar që atëherë në gjithë Francën, ndërsa janë regjistruar përleshje midis protestuesve dhe policisë në shumë qytete, si Paris, Bordeaux, Lyon, Roubaix, Marseille dhe Lille.

Protestuesit i vunë flakën ndërtesave të ndryshme dhe vandalizuan pronat publike, dhe një numër periferish dhe qytetesh në rajonin e Parisit zbatuan shtetrrethim.

Të gjitha rajonet në Francë u prekën dhe videot në mediat sociale treguan protestuesit duke plaçkitur restorante dhe dyqane.

Ndërtesat publike, duke përfshirë shkollat, u vunë gjithashtu në shënjestër, dhe të paktën dhjetëra autobusë publikë u dogjën në rajonin e Parisit.

Deri në 942 ndërtesa u shënjestruan, 2.000 automjete u dogjën dhe gjithsej 3.880 zjarre u ndezën gjatë natës, ka cituar Le Figaro, të ketë thënë presidenti Macron.

Borne në një postim të mëparshëm në Twitter i kishte përshkruar aktet e dhunës si “të patolerueshme dhe të pafalshme”.

Ministria e Brendshme ka thënë se policia ka arrestuar 875 persona, duke përfshirë 408 në rajonin e Parisit. Gjatë përleshjeve janë plagosur 249 policë.

Exit mobile version