Liga Arabe ka mbajtur një takim urgjent në Kajro për të diskutuar masat e fundit të Izraelit që synojnë zgjerimin e vendbanimeve të paligjshme dhe forcimin e kontrollit mbi Bregun Perëndimor të pushtuar.
Në një deklaratë pas takimit, Këshilli i Ligës Arabe i bëri thirrje presidentit amerikan Donald Trump që të përmbushë zotimet e tij për arritjen e paqes dhe të ndërmarrë “hapa praktikë dhe të qartë” për të parandaluar aneksimin izraelit të territoreve palestineze.
Këshilli theksoi se çdo aneksim i tokës palestineze përbën krim lufte dhe riafirmoi mbështetjen për të drejtën e palestinezëve për një shtet të pavarur brenda kufijve të 4 qershorit 1967, me Kudsin Lindor si kryeqytet dhe me përfshirjen e vendeve të shenjta.
Sipas Ligës Arabe, të gjitha vendimet dhe masat izraelite që synojnë grabitjen e tokës palestineze dhe ndryshimin e statusit të saj ligjor dhe demografik janë “të pavlefshme dhe pa efekt juridik”.
Të dielën, kabineti i sigurisë i Izraelit miratoi masa për zgjerimin e ndërtimit të vendbanimeve të paligjshme dhe rritjen e kontrollit izraelit mbi Bregun Perëndimor. Mediat izraelite raportojnë se këto masa përfshijnë shfuqizimin e një ligji që ndalonte shitjen e tokës për kolonët izraelitë, hapjen e regjistrave të pronësisë dhe kalimin e kompetencave për lejet e ndërtimit pranë Hebronit nga autoritetet palestineze te administrata civile izraelite.
Zyrtarë të Ligës Arabe i cilësuan këto veprime si një përshkallëzim të paprecedent që synon konsolidimin e aneksimit de facto të pjesëve të mëdha të Bregut Perëndimor, duke paralajmëruar se ato minojnë bazën politike të zgjidhjes me dy shtete.
Përfaqësues palestinezë dhe arabë në takim thanë se vendimet izraelite përbëjnë shkelje të hapur të së drejtës ndërkombëtare dhe rrezikojnë legjitimitetin ndërkombëtar të procesit të paqes.
Në korrik 2024, Gjykata Ndërkombëtare e Drejtësisë e shpalli të paligjshëm pushtimin izraelit të territoreve palestineze dhe kërkoi evakuimin e të gjitha vendbanimeve në Bregun Perëndimor dhe Kudsin Lindor.
Që nga nisja e luftës në Gaza në tetor 2023, Izraeli ka intensifikuar operacionet në Bregun Perëndimor, përfshirë vrasje, arrestime, zhvendosje dhe zgjerim të vendbanimeve, të cilat palestinezët i shohin si hapa drejt aneksimit formal të territorit. /mesazhi
