Presidenti francez Emmanuel Macron ka shqyrtuar një raport të klasifikuar që akuzon Vëllazërinë Myslimane për përpjekje të fshehta për të minuar vlerat laike të Francës dhe për të ndikuar në institucionet shtetërore përmes një strategjie afatgjatë, jo të dhunshme, të ashtuquajtur “islamizëm politik”.
Raporti, i cili nuk është bërë publik, identifikon organizatën “Muslimanët e Francës” (Musulmans de France) si degën kryesore të Vëllazërisë Myslimane në vend. Sipas dokumentit, grupi synon të ndikojë në shkolla, xhami dhe organizata joqeveritare për të ndikuar në politikat lokale dhe kombëtare, veçanërisht në çështjet që lidhen me laicitetin dhe barazinë gjinore.
Në përgjigje, Macron ka urdhëruar ministrat të hartojnë masa konkrete për të adresuar këto shqetësime, me propozime që pritet të shqyrtohen në një takim të planifikuar për muajin qershor. Kjo lëvizje vjen në një kohë kur presidenti përballet me presion në rritje nga opozita e djathtë ekstreme për të vepruar kundër ndikimit të islamizmit politik në Francë.
Megjithatë, raporti ka ngjallur kritika nga disa anëtarë të komunitetit mysliman dhe akademikë, të cilët shprehin shqetësime për tonin dhe pasojat e tij, duke e konsideruar si një përpjekje për të stigmatizuar myslimanët në përgjithësi.
Vëllazëria Myslimane, e themeluar në Egjipt në vitin 1928, është një lëvizje islamike ndërkombëtare që synon të promovojë ligjin islam përmes angazhimit politik paqësor. /mesazhi
