Mijëra qytetarë palestinezë falën sot namazin e xhumasë në Xhaminë Al-Aksa, pavarësisht masave të rrepta ushtarake të vendosura nga autoritetet izraelite për të kufizuar hyrjen në kompleksin e shenjtë.
Burime lokale i thanë agjencisë WAFA se forcat izraelite penguan mbërritjen e besimtarëve përmes Portës së Damaskut (Bab al-Amud) dhe Portës së Luanëve (Bab al-Asbat), duke kontrolluar dokumentet e identitetit, ndaluar disa të rinj dhe duke ua mohuar hyrjen në xhami. Sipas të njëjtave burime, u arrestua i riu Arin al-Za’anin nga oborret e Al-Aksas, si dhe një tjetër i ri dhe dy fëmijë në zonën e Bab al-Asbat.
Gjithashtu, autoritetet izraelite i dorëzuan rojtarit (murabit) të Jerusalemit, Nizam Abu Rumuz, një urdhër ndalimi që e përjashton atë nga hyrja në Xhaminë Al-Aksa për një javë, me mundësi rinovimi. Vendimi shoqërohej me një hartë që përcakton zonat ku atij i ndalohet qëndrimi në rrethinat e kompleksit.
Forcat izraelite vijojnë të imponojnë kufizime të ashpra për hyrjen e besimtarëve në Al-Aksa, veçanërisht gjatë ditëve të premte. Po ashtu, mijëra qytetarë nga provincat e Bregut Perëndimor privohen nga e drejta për të shkuar në Jerusalem për t’u falur, pasi u kërkohen leje të posaçme për të kaluar pikat e kontrollit ushtarak që rrethojnë qytetin e shenjtë. /mesazhi
