Slate, një startup për automjete elektrike i mbështetur nga themeluesi i Amazon, Jeff Bezos, njoftoi të hënën se ka marrë më shumë se 100,000 rezervime për kamionçinën e saj elektrike me çmim të përballueshëm.
Çmimi i rezervimit është vetëm 50 dollarë, që do të thotë se kompania ka mbledhur tashmë mbi 5 milionë dollarë përmes pagesave të rezervimit, transmeton Telegrafi.
“Jemi vërtet mirënjohës për reagimin e amerikanëve ndaj lansimit të markës Slate dhe kamionçinës sonë. Jemi të emocionuar për atë që na pret “, tha për TechCrunch, Jeremy Snyder, drejtori komercial i kompanisë.
Ky moment historik vjen vetëm dy javë pas prezantimit të një modeli, që pritet të kushtojë nën 25,000 dollarë me subvencione federale.
Interesi i madh tregon se ekziston një kërkesë e fortë për automjete pune të thjeshta dhe të përballueshme – një segment që aktualisht praktikisht nuk ekziston në tregun amerikan.
Sigurisht, rezervimet nuk nënkuptojnë automatikisht shitje. Për shembull, Cadillac pretendoi se kishte rezerva për 18 muaj prodhimi të modelit Celestiq, por më vonë u zbulua se kishte shitur më pak se 25 njësi.
Në mënyrë të ngjashme, Fisker pretendoi se kishte më shumë se 60,000 rezervime për Ocean SUV dhe përfundoi duke shitur vetëm disa mijëra automjete përpara se të falimentonte.
Madje edhe Tesla thuhet se kishte më shumë se një milion rezervime për Cybertruck, por pas rreth 50,000 njësive të shitura, një numër i madh kamionësh mbetën të pashitur në depo.
Ndryshe nga shembujt e mësipërm, kamionçina e Slate duket si një produkt më realist dhe praktik. Çmimi i ulët dhe dizajni i thjeshtë nënkuptojnë se ka një grup shumë më të gjerë klientësh.
Gjithashtu, klientët nuk do të duhet të presin gjatë. Slate raporton se fabrika e saj në Indiana do të ketë kapacitetin për të prodhuar deri në 150,000 automjete në vit, duke filluar nga viti 2027.
Prodhimi i kamionçinës është planifikuar të fillojë vitin e ardhshëm, dhe deri atëherë mund të vizitoni konfiguruesin në faqen e internetit, ku mund të zgjidhni midis tre versioneve të karrocerisë dhe dhjetëra aksesorëve dhe pajisjeve.
