Presidenti i SHBA-së, Donald Trump, tha se do të vendosë një tarifë të re prej 10 për qind për vendet anembanë botës, pas vendimit të Gjykatës Supreme që hodhi poshtë fushatën e tij globale të taksave mbi importet, raporton Anadolu.
Trump kritikoi ashpër gjykatën e lartë menjëherë pas vendimit me 6 vota pro dhe 3 kundër, duke thënë se ndihet “i turpëruar për disa anëtarë të gjykatës, absolutisht i turpëruar për mungesën e guximit për të bërë atë që është e drejtë për vendin tonë”.
“Vendet e huaja që na kanë shfrytëzuar për vite me radhë janë të entuziazmuara. Janë kaq të lumtura dhe po vallëzojnë në rrugë, por nuk do të vallëzojnë për shumë gjatë. Këtë mund ta siguroj”, u tha ai gazetarëve në Shtëpinë e Bardhë.
Presidenti amerikan tha se si përgjigje ndaj vendimit ai do të nënshkruajë një urdhër ekzekutiv për të zbatuar një tarifë prej 10 për qind “përtej tarifave tona normale që tashmë po zbatohen” për vendet anembanë botës, për të shmangur refuzimin e gjykatës.
Hetime shtesë tregtare do të nisin sipas Seksionit 301 të Ligjit të Tregtisë së vitit 1974, i cili lejon presidentin të vendosë tarifa mbi vendet që konsiderohen të angazhuara në praktika tregtare “të padrejta” dhe “të palogjikshme ose diskriminuese”.
“Vendimi i tyre është i pasaktë, por nuk ka rëndësi, sepse ne kemi alternativa shumë të fuqishme që janë miratuar nga ky vendim”, tha Trump për Gjykatën Supreme.
