Holanda do të shkojë drejt kutive të votimit më 29 tetor për zgjedhje të përgjithshme të parakohshme, pasi udhëheqësi i Partisë për Liri të ekstremit të djathtë, Geert Wilders, tërhoqi mbështetjen e tij nga koalicioni qeverisës, duke shkaktuar rënien e tij, transmeton Anadolu.
“Kemi caktuar zyrtarisht datën e zgjedhjeve: zgjedhjet e Dhomës së Dytë do të zhvillohen të mërkurën, më 29 tetor 2025”, njoftoi sot në X ministrja e Brendshme në detyrë, Judith Uitermark, duke shtuar se po bëhen përgatitje për të siguruar që votimi të vazhdojë pa probleme.
Qeveria u rrëzua më 3 qershor, pasi Partia për Liri (PVV) e ekstremit të djathtë u tërhoq nga koalicioni qeverisës për shkak të mosmarrëveshjeve të pazgjidhura mbi politikën e azilit dhe migracionit.
Partnerët e koalicionit, VVD-ja konservatore, Kontrata e Re Sociale (NSC) e qendrës dhe partia e fermerëve BBB, nuk arritën një marrëveshje me Wildersin, i cili kishte kërkuar kufizime të gjera mbi politikën holandeze të azilit dhe migracionit.
