Dëshmitë e të mbijetuarve afganë kanë ngritur pikëpyetje të reja mbi rolin e rojes bregdetare greke në një mbytje tragjike anijeje pranë ishullit grek të Kiosit, ku humbën jetën 15 migrantë.
Ngjarja ndodhi më 3 shkurt, kur një gomone me refugjatë afganë u përmbys në Detin Egje. Pesëmbëdhjetë persona humbën jetën, ndërsa rreth dy dhjetëra të tjerë, përfshirë 11 fëmijë, u shpëtuan, disa prej tyre me lëndime të rënda.
Autoritetet greke deklaruan se varka e migrantëve lëvizte pa drita navigimi, injoroi paralajmërimet për t’u ndalur dhe më pas ndryshoi papritur drejtim, duke u përplasur me një anije të rojes bregdetare, çka çoi në përmbysjen e saj.
Megjithatë, tre të mbijetuar i thanë agjencisë Reuters një version tjetër të ngjarjes. Ata thanë se nuk pati asnjë paralajmërim nga roja bregdetare dhe se varka e tyre po lëvizte drejt, kur papritur u shfaq një anije patrullimi që ndezi dritat vetëm pak çaste para përplasjes.
“Nëse do të na kishin ndjekur, do të ishim ndalur,” tha një nga të mbijetuarit. “Ishim në një gomone me fëmijë. Nuk ndryshuam drejtim.”
Roja bregdetare greke nuk iu përgjigj kërkesave për koment dhe më herët ka mohuar akuzat për keqveprim. Ministri grek i Migracionit lavdëroi rojen bregdetare për shpëtimin e të mbijetuarve dhe fajësoi trafikantët për vdekjet. Ndërkohë, një shtetas maroken është ndaluar, i akuzuar se shkaktoi aksidentin.
Reuters theksoi se nuk mund t’i verifikojë në mënyrë të pavarur dëshmitë e të mbijetuarve. Burime pranë hetimit thanë se kamera në anijen e rojes bregdetare nuk ishte në funksion në momentin e incidentit.
Rasti i fundit i shtohet shqetësimeve të vazhdueshme mbi praktikat e kontrollit kufitar të Greqisë që nga kriza e migracionit në vitin 2015, përfshirë akuzat për kthime të paligjshme të migrantëve. Agjencia kufitare e BE-së ka bërë të ditur se po shqyrton disa raste të dyshuara për shkelje të të drejtave të njeriut nga autoritetet greke. /mesazhi
