Komisioni Evropian ka paraqitur një strategji të re, të quajtur ‘ProtectEU’ (Mbroni BE-në), për të luftuar terrorizmin dhe ekstremizmin e dhunshëm në të gjithë bllokun, transmeton Anadolu.
Sipas Komisionit Evropian, nisma synon të përshtatë reagimin e sigurisë së BE-së ndaj kërcënimeve në zhvillim, përfshirë keqpërdorimin e teknologjive digjitale, radikalizimin e të miturve në internet dhe tensionet gjeopolitike.
‘ProtectEU’ përqendrohet në gjashtë prioritete kryesore, përkatësisht në parashikimin e kërcënimeve, parandalimin e radikalizimit, mbrojtjen e qytetarëve në internet, sigurimin e hapësirave publike dhe infrastrukturës kritike, reagimin ndaj sulmeve dhe forcimin e bashkëpunimit ndërkombëtar.
Masat përfshijnë zgjerimin e Kapacitetit të Përbashkët të Analizës së Inteligjencës, forcimin e kapaciteteve analitike të Europol-it dhe financimin e kërkimeve mbi teknologjitë e reja si inteligjenca artificiale, dronët dhe armët e prodhuara me printim 3D.
Agjenda parashikon gjithashtu një “Pakete Mjetesh për Parandalim” dhe një “Program për Angazhimin dhe Fuqizimin e Komuniteteve” me vlerë 5 milionë euro (5.9 milionë dollarë), me synim luftimin e radikalizimit dhe fuqizimin e të rinjve.
Komisioni Evropian planifikon të rishikojë Rregulloren për Përmbajtjen Terroriste në Internet, të forcojë bashkëpunimin me kompanitë teknologjike përmes Forumit të Internetit të BE-së dhe të përmirësojë Protokollin e Krizave të BE-së në një Kornizë Reagimi ndaj Krizave Online.
Një fond prej 30 milionë eurosh do të përdoret për rritjen e sigurisë në hapësirat publike, ndërsa janë parashikuar edhe masa për gjurmimin e financimit të terrorizmit, përfshirë përmes kriptomonedhave.
Bashkëpunimi ndërkombëtar me partnerët e Mesdheut dhe Ballkanit Perëndimor do të intensifikohet për shkëmbimin e inteligjencës dhe zbatimin e veprimeve të përbashkëta kundër terrorizmit.
Zyrtarët e BE-së theksuan se nisma ‘ProtectEU’ do të ndihmojë në parandalimin e kërcënimeve përpara se ato të materializohen dhe në përmirësimin e reagimit të shpejtë ndaj sulmeve.
