Në Britaninë e Madhe ka një krizë të furnizimit me karburant. Shkak është fakti që vendi po përballet me krizën e mungesës së shoferëve të kamionëve, duke sjellë një defiçit në furnizimin me karburant. Ushtria është vënë në gatishmëri për të ndihmuar në zbutjen e presionit mbi stacionet e benzinës dhe dërgimin e karburantit atje ku është më e nevojshme.
Industria e karburantit pret që kërkesa të kthehet në normalitet në ditët në vijim. Ministrat kanë fajësuar radhët në stacionet e benzinës. Shumë qytetarë nxituan në stacione mes frikës. Kërkesa për Ndihmë Ushtarake për Autoritetet Civile u lëshua nga sekretari i biznesit të hënën.
Kwarteng tha: “Mbretëria e Bashkuar vazhdon të ketë furnizime të fuqishme me karburant, megjithatë ne jemi të vetëdijshëm për çështjet e zinxhirit të furnizimit në pikat e karburantit dhe po ndërmarrim hapa për t’i lehtësuar ato si çështje prioritare.
Nëse kërkohet, vendosja e personelit ushtarak do t’i sigurojë zinxhirit të furnizimit kapacitet shtesë si një masë e përkohshme për të ndihmuar në lehtësimin e presioneve të shkaktuara nga rritja e kërkesës së lokalizuar për karburant” tha ai.
Sekretari i Transportit Grant Shapps tha: “Njerëzit i janë përgjigjur mesazhit që të furnizohen vetëm kur në të vërtetë kanë nevojë për karburant. Edhe pse rrjeti aktual i cisternave është i aftë të sigurojë të gjithë karburantin që na nevojitet ne kemi ndërmarrë hapin shtesë për t’i kërkuar ushtrisë të ndihmojë në mbylljen e hendekut” tha ai.
Në një deklaratë të përbashkët të hënën në mbrëmje, një grup furnizuesish kryesorë, përfshirë BP dhe Shell, thanë se kishte shumë karburant në rafineritë në Mbretërinë e Bashkuar për të qetësuar njerëzit që janë dyndur në pikat e furnizimit. “Ne presim që kërkesa të kthehet në nivelet e saj normale në ditët në vijim, duke lehtësuar presionet në pikat e karburantit“.
Ambulancat kanë pompat e tyre të karburantit dhe furnizimet e tyre pritet të kenë përparësi. Të dielën qeveria tha se do të përjashtojë përkohësisht kompanitë e karburantit nga ligji i konkurrencës duke i lejuar ata të synojnë furnizimet në zonat më në nevojë.
Por përse erdhi kjo krizë? Pasi Mbretëria e Bashkuar u largua nga BE, shumë shoferë evropianë u kthyen në vendet e tyre, ose vendosën të punonin diku tjetër për shkak të burokracisë shtesë kufitare dhe ndikimit që kishte në të ardhurat e tyre. Pandemia gjithashtu ndikoi. Përballë kësaj situata Britania e Madhe pritet që të japë 10.000 viza për mungesën e fuqisë punëtore. /abcnews
