Google u akuzua në një padi për përdorimin e asistentit të saj Gemini AI për të ndjekur në mënyrë të paligjshme komunikimet private të përdoruesve të programeve të saj Gmail, mesazheve të menjëhershme dhe video-konferencave.
Në të kaluarën, përdoruesve të Gmail, Chat dhe Meet iu dha mundësia të aktivizonin programin e inteligjencës artificiale të Google.
Por në tetor, njësia Alphabet aktivizoi “fshehurazi” Gemini për të gjitha ato aplikacione, duke i mundësuar asaj të mbledhë të dhëna private, sipas padisë së paraqitur në gjykatën federale në San Jose – Kaliforni.
Ndërsa kompania u lejon përdoruesve të çaktivizojnë Gemini, ata duhet të gërmojnë në cilësimet e privatësisë së Google për të çaktivizuar mjetin e IA-së, sipas padisë së propozuar të veprimit kolektiv.
Nëse nuk e ndërmarrin këtë hap, Google përdor Gemini për të “qasur dhe shfrytëzuar të gjithë historinë e regjistruar të komunikimeve private të përdoruesve të saj, duke përfshirë fjalë për fjalë çdo email dhe bashkëngjitje të dërguar dhe marrë në llogaritë e tyre Gmail”, sipas padisë.
Padia pretendon se Google po shkel Aktin e Kalifornisë për Pushtimin e Privatësisë, një ligj i vitit 1967 që ndalon përgjimin e fshehtë dhe regjistrimin e komunikimeve konfidenciale pa pëlqimin e të gjitha palëve të përfshira.
