Të paktën 10 palestinezë, mes tyre gra dhe fëmijë, u vranë në sulmin ajror të ushtrisë izraelite në qytetin e Gazës, raporton Anadolu.
Sipas informacioneve të marra nga dëshmitarë okularë dhe burime spitalore, avionët e ushtrisë izraelite kanë shënjestruar banesën e një familjeje palestineze në distriktin Al-Daraj.
Në sulmin që kishte në shënjestër banesën ku jetonte një familje palestineze e zhvendosur me forcë, humbën jetën 10 persona, përfshirë gra dhe fëmijë ndërsa shumë njerëz u plagosën.
Dëshmitarët thanë se ushtria izraelite vazhdon sulmet ndaj spitalit “Kamal Adwan” në veri të Rripit të Gazës. Më shumë se 10 bomba u hodhën në zonat e spitalit nga mjete ajrore pa pilot (dronë). Si pasojë e shpërthimeve ka rënë zjarr në një godinë që i përket spitalit. Përreth spitalit u vendosën tre robotë dhe fuçi të mbushura me eksploziv.
Si pasojë e bombardimeve të përsëritura të rajonit dhe rrethimit, në spital ka ndërprerje të energjisë elektrike dhe mungesë të ilaçeve dhe produkteve mjekësore. Për shkak të shkëputjes me personelin e spitalit, nuk mund të merret asnjë informacion lidhur me humbjet e jetëve apo plagosjet e shkaktuara nga sulmet.
Si rezultat i goditjes së gjeneratorëve në sulmin që Izraeli kreu mbrëmë me dronë ndaj spitalit “Kamal Adwan”, u ndërpre energjia elektrike ndërsa u dëmtua njësia e kujdesit intensiv në të cilin ndodhen mbi 50 pacientë.
