Ushtria izraelite sot u bëri thirrje banorëve në jug të Libanit të evakuojnë zonat në jug të lumit Zahrani, duke përmendur operacionet ushtarake që po zhvillohen kundër Hezbollahut, transmeton Anadolu.
Në një deklaratë në platformën amerikane të mediave sociale X, zëdhënësi ushtarak Avichay Adraee tha se ushtria do të vazhdojë sulmet ajrore intensive dhe u bëri thirrje civilëve të largohen menjëherë.
“Sulmet ajrore janë duke vazhduar ndërsa ushtria vepron me forcë të madhe në zonë. Për sigurinë tuaj, ju bëjmë thirrje përsëri të evakuoni menjëherë shtëpitë tuaja dhe të shkoni në veri të lumit Zahrani”, tha ai.
Adraee tha se operacionet synojnë atë që ai e përshkroi si aktivitet të Hezbollahut, duke paralajmëruar se civilët pranë anëtarëve ose objekteve të grupit do të jenë në rrezik. “Kushdo që ndodhet pranë operativëve, infrastrukturës ose mjeteve luftarake të Hezbollahut po e vë jetën e tij në rrezik”, tha ai.
Sipas tij, qëndrimi në jug të lumit ose përpjekja për t’u zhvendosur më tej në jug mund t’i ekspozojë civilët ndaj rrezikut. Paralajmërimi erdhi ndërsa presidenti i SHBA-së, Donald Trump tha të mërkurën vonë se udhëheqësit izraelitë dhe libanezë do të flasin drejtpërdrejt të enjten për herë të parë në afërsisht tre dekada.
Njoftimi pasoi pas një takimi të martën në Departamentin e Shtetit ku morën pjesë ambasadorja libaneze Nada Hamadeh dhe ambasadori izraelit Yechiel Leiter, i organizuar nga sekretari i Shtetit Marco Rubio së bashku me ambasadorin amerikan në Liban, Michel Issa, këshilltarin e Departamentit të Shtetit, Michael Needham dhe ambasadorin amerikan në Kombet e Bashkuara, Mike Waltz.
Hezbollahu nuk u përfaqësua në takim.
Izraeli ka vazhduar sulmet në jug të Libanit pas një sulmi ndërkufitar nga Hezbollahu më 2 mars, pavarësisht një armëpushimi që hyri në fuqi në nëntor 2024. Autoritetet shëndetësore libaneze thonë se mbi 2.000 njerëz janë vrarë dhe më shumë se 1 milion janë zhvendosur që nga marsi.
