Forcat izraelite të okupimit kanë nisur prej rreth një muaji punime të gjera nivelimi në toka që i përkasin banorëve palestinezë të fshatrave Jinsafut dhe Al-Funduq, në lindje të qytetit Qalqilya.
Kreu i këshillit të fshatit Jinsafut, Jalal Bashir, deklaroi për agjencinë palestineze të lajmeve WAFA se punimet e nivelimit po vazhdojnë në zonën lindore të fshatit, me qëllim ndërtimin e një rruge të gjerë që lidh vendbanimet izraelite në lindje të Qalqilyas me ato në veri të saj.
Sipas Bashir, rruga e re koloniale do të kalojë përmes rrugës kryesore Qalqilya-Nablus, e njohur si “55,” dhe do të lidh vendbanimet Immanuel, Qarni Shomron dhe Qedumim, të ndërtuara mbi tokat e fshatit Jinsafut.
Nga ana tjetër, Louay Taym, kreu i këshillit të fshatit Al-Funduq, shpjegoi se projekti do të rezultojë në shkatërrimin e të paktën 220 dunumëve të tokës bujqësore pjellore, pronë e rreth 70 fermerëve lokalë. Gjithashtu, rreth 200 dunumë të tjerë janë të kërcënuar për shkak të afërsisë me rrugën e re, gjë që i bën të papërshtatshme për përdorim bujqësor ose banim.
Ai shtoi se zbatimi i projektit ka sjellë edhe mbylljen e disa rrugëve bujqësore të rëndësishme, të cilat më parë u mundësonin fermerëve të arritnin shpejt në tokat e tyre. Kjo ka shtuar vështirësitë për komunitetin bujqësor lokal.
Munif Nazzal, zyrtar përgjegjës për çështjet e vendbanimeve në Guvernatoratin e Qalqilyas, deklaroi se projekti është pjesë e një plani më të gjerë kolonial, që synon lidhjen e blloqeve të mëdha të vendbanimeve izraelite dhe izolimin e fshatrave palestinezë nëpërmjet ndarjes gjeografike.
