Kabineti izraelit i Sigurisë miratoi “fshehurazi” ndërtimin e 34 vendbanimeve të paligjshme në Bregun Perëndimor të pushtuar gjatë një seance të kohëve të fundit, transmeton Anadolu.
Kanali izraelit “Channel 24” nuk specifikoi datën e saktë të vendimit, por tha se ai u mor gjatë fushatës ushtarake të SHBA-së dhe Izraelit kundër Iranit që filloi më 28 shkurt.
“Kabineti i Sigurisë miratoi fshehurazi ndërtimin e 34 vendbanimeve të reja në Bregun Perëndimor, një numër rekord i miratuar me një lëvizje të vetme gjatë fushatës kundër Iranit”, tha kanali.
Vendet e miratuara përfshijnë lokacione brenda lagjeve palestineze në veri të Bregut Perëndimor dhe zona të largëta që rrallë arrihen nga forcat izraelite, tha transmetuesi. “Ky është numri më i madh i vendbanimeve të miratuara ndonjëherë në një seancë të vetme kabineti”, shtoi kanali.
Sipas raportit, numri i përgjithshëm i vendbanimeve të paligjshme të miratuara nga qeveria e kryeministrit Benjamin Netanyahu që kur ajo erdhi në pushtet në fund të vitit 2022 u rrit në 103.
Sipas kanalit, shefi i Shtabit të Izraelit, gjeneral-lejtnant Eyal Zamir mori pjesë në takim dhe nuk e kundërshtoi në mënyrë të qartë vendimin. Ai, megjithatë, ngriti shqetësime në lidhje me fuqinë punëtore të kufizuar dhe kërkoi një vlerësim të zbatimit të vendimit në shumë zona njëkohësisht.
Kabineti zgjodhi ta mbante vendimin sekret për të shmangur presionin e SHBA-së gjatë luftës së vazhdueshme kundër Iranit, pasi presidenti amerikan Donald Trump ka kundërshtuar publikisht aneksimin e Bregut Perëndimor nga Izraeli, tha kanali.
Nuk pati asnjë koment të menjëhershëm nga qeveria izraelite mbi raportin. Zgjerimi i paligjshëm i vendbanimeve në Bregun Perëndimor të pushtuar, përfshirë Kudsin Lindor, është përshpejtuar që kur qeveria e Netanyahut mori detyrën në fund të vitit 2022.
Bashkësia ndërkombëtare dhe OKB-ja e konsiderojnë Bregun Perëndimor, përfshirë Kudsin Lindor, territor të pushtuar palestinez ndërsa aktivitetin e vendbanimeve izraelite atje si “të paligjshëm” sipas ligjit ndërkombëtar.
Rreth 750 mijë pushtues izraelitë jetojnë në 141 vendbanime të paligjshme dhe 224 postblloqe në të gjithë Bregun Perëndimor, përfshirë 250 mijë në 15 vendbanime të paligjshme në Kudsin Lindor.
Në vitet e fundit, forcat dhe pushtuesit izraelitë kanë intensifikuar operacionet në të gjithë Bregun Perëndimor, përfshirë Kudsin Lindor ndërsa kanë kryer arrestime, vrasje, shkatërrim prone dhe zhvendosje të palestinezëve, së bashku me zgjerimin e vazhdueshëm të vendbanimeve të paligjshme.
Zyrtarët palestinezë paralajmërojnë se veprime të tilla mund t’i hapin rrugën Izraelit për të aneksuar zyrtarisht Bregun Perëndimor, duke i dhënë fund në mënyrë efektive perspektivave për një shtet palestinez siç parashikohet në rezolutat e OKB-së.
Në një mendim historik në korrik 2024, Gjykata Ndërkombëtare e Drejtësisë e shpalli pushtimin e territorit palestinez nga Izraeli të paligjshëm dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.
