Bëhet e ditur se presidenti i parë i Kazakistanit, Nursultan Nazarbayev, ia ka dorëzuar vetë kryesinë e Këshillit të Sigurimit Presidentit të Kazakistanit, Kasim Comert Tokayev.
Këshilltari për shtyp i Nazarbayevit, Aydos Ukibay deklaroi se Nazarbayevi ishte në Nur-Sultan gjatë ngjarjeve në Kazakistan dhe mbështeti Presidentin Tokayev.
“Situata ishte shumë e vështirë dhe për këtë arsye ‘Lideri i Kombit’ vendosi t’ia dorëzonte Presidentit kryesinë e Këshillit të Sigurimit, duke e ditur shumë mirë se trazirat dhe terrorizmi kërkojnë një përgjigje të shpejtë, të vendosur dhe pa kompromis nga lidershipi i vendit”, u shpreh Ukibay.
Duke theksuar se Nazarbayev dhe Tokayev kanë qenë gjithmonë në të njëjtën anë duke mbrojtur popullin e tyre, vendin dhe të ardhmen e kombit, Ukibay tha: “Nazarbayev dhe Tokayev treguan edhe një herë fuqinë e tyre solide shtetërore në këto ditë të vështira për të gjithë ne”.
Duke vënë në dukje se ka shumë lajme të rreme dhe të dhëna provokuese që qarkullojnë në shtyp dhe në mediat sociale për Presidentin e parë të Kazakistanit, Ukibay tha: “Në rrethanat aktuale, ne i shohim aktivitete të tilla si një përpjekje për të destabilizuar situatën politike dhe për të minuar themelet kushtetuese të shtetit”.
Nursultan Nazarbayev, i cili u zgjodh presidenti i parë i Kazakistanit, vend i cili fitoi pavarësinë në vitin 1991 pas shpërbërjes së ish-Bashkimit Sovjetik, qëndroi në detyrë deri në mars 2019, kur ia dorëzoi detyrën Kasim Comert Tokayevit.
Nazarbayev vazhdoi detyrën si Kryetar i Këshillit të Sigurimit të Kazakistanit.
Pasi protestat e nisura më 2 janar në Kazakistan u kthyen në ngjarje rruge dhe përleshje mes forcave të sigurisë dhe protestuesve, Tokayev njoftoi se mori Presidencën e Këshillit të Sigurimit. /trt
