Ndërsa shumë vende evropiane po përpiqen të heqin dorë nga gazi rus, Kina po importon një sasi në rritje të energjisë nga Rusia.
Të dhënat nga Zyra Doganore e Pekinit treguan se Rusia është furnizuesi më i madh i Kinës me naftë për të tretin muaj radhazi.
Në korrik, Kina importoi gjithsej 7.15 milionë tonë naftë ruse, 7,6% më shumë në terma vjetore. Në të njëjtën kohë, importet e qymyrit nga Rusia u rritën në nivelin më të lartë në mbi pesë vjet me 7.42 milionë tonë në korrik, rreth 14% më shumë krahasuar me të njëjtin muaj të vitit të kaluar.
Ndërsa Bashkimi Evropian është përpjekur të reduktojë varësinë e tij nga furnizimet ruse të energjisë në kuadër të pushtimit të vendit në Ukrainë, pothuajse gjashtë muaj më parë, Kina ka përfituar nga çmimet e zbritura të mallrave nga Rusia për të rritur importet e saj.
Deri më tani, Pekini nuk e ka dënuar luftën e Rusisë në Ukrainë, por vazhdon të pohojë besnikërinë e tij ndaj Moskës. /atsh
