Kina tha sot se është “thellësisht e shqetësuar” për situatën aktuale në enklavën palestineze të rrethuar të Gazës, duke i bërë thirrje Izraelit të shmangë përshkallëzimin, transmeton Anadolu.
“Kundërshtojmë çdo veprim që dëmton civilët dhe shkel të drejtën ndërkombëtare”, u tha gazetarëve në Pekin zëdhënësja e Ministrisë së Punëve të Jashtme, Mao Ning.
“Kina shpreson që marrëveshja e armëpushimit të zbatohet në Gaza, kriza humanitare të lehtësohet dhe stabiliteti të rikthehet sa më shpejt”, tha Mao duke iu folur pas sulmeve ajrore izraelite në Gaza që vranë 15 palestinezë një ditë më parë.
Duke iu drejtuar “në veçanti Izraelit”, Mao tha se palët përkatëse duhet të “tregojnë përmbajtje dhe të shmangin përshkallëzimin e mëtejshëm”.
Të paktën 15 palestinezë, përfshirë pesë fëmijë, janë vrarë në sulme ajrore izraelite në Rripin e Gazës që nga e enjtja në mëngjes, pavarësisht marrëveshjes së armëpushimit, sipas agjencisë zyrtare palestineze të lajmeve Wafa.
Zyrtarët shëndetësorë palestinezë thanë se Izraeli ka shënjestruar tenda ku strehoheshin persona të zhvendosur, shtëpi dhe një shkollë në pjesë të ndryshme të Gazës.
Ministria e Shëndetësisë e Gazës tha se pavarësisht armëpushimit që hyri në fuqi më 10 tetor, shkeljet izraelite kanë vazhduar, me 425 palestinezë të vrarë dhe 1.206 të plagosur gjatë këtyre shkeljeve.
