Udhëheqësi i Koresë së Veriut, Kim Jong Un, ka ndjekur testimin e një motori me shtytje të lartë me karburant të ngurtë për armë dhe e ka cilësuar atë si një zhvillim që rrit kapacitetin strategjik ushtarak të vendit, raportuan mediat shtetërore të dielën.
Testi ka të ngjarë të tregojë se Kim synon të zgjerojë dhe modernizojë arsenalin e raketave të afta për të arritur territorin kontinental të Shteteve të Bashkuara.
Raporti i së dielës nga agjencia shtetërore “Korean Central News Agency” erdhi disa ditë pasi Kim mbajti një fjalim në parlamentin e Koresë së Veriut, ku premtoi të konsolidojë në mënyrë të pakthyeshme statusin e vendit si fuqi bërthamore dhe akuzoi SHBA-në për “terrorizëm shtetëror dhe agresion global”, në një referencë të dukshme ndaj luftës në Lindjen e Mesme.
Sipas KCNA, Kim ndoqi testin tokësor të motorit të ri të përmirësuar. Agjencia raportoi se shtytja maksimale e motorit është 2,500 kilotonë, nga rreth 1,971 kilotonë në një test i ngjashëm i kryer në shtator.
Sipas vëzhguesve, përpjekjet për të rritur fuqinë e motorit lidhen me synimin për të vendosur disa koka bërthamore në një raketë të vetme, për të rritur mundësinë e depërtimit të mbrojtjes amerikane.
KCNA nuk bëri të ditur saktësisht se kur dhe ku u zhvillua testi.
Testi u krye në kuadër të programit pesëvjeçar të përshkallëzimit ushtarak të vendit, objektivat e të cilit përfshijnë përmirësimin e “mjeteve të goditjes strategjike”, sipas agjencisë.
Kjo referencë kuptohet se i drejtohet raketave balistike ndërkontinentale me kapacitet bërthamor që synojnë territorin e SHBA-së.
Kim tha se testi i fundit i motorit ka “rëndësi të madhe për vendosjen e fuqisë strategjike ushtarake të vendit në nivelin më të lartë”, raportoi KCNA.
Në vitet e fundit, Koreja e Veriut ka testuar një sërë raketash balistike ndërkontinentale, duke demonstruar potencialin për të arritur territorin amerikan, përfshirë raketa me karburant të ngurtë që e bëjnë më të vështirë zbulimin para nisjes. Raketa më të vjetra me karburant të lëngshëm duhet të furnizohen para nisjes dhe nuk mund të qëndrojnë gjatë në gjendje gatishmërie.
Disa ekspertë të huaj thonë se Koreja e Veriut ende përballet me pengesa teknologjike për të pasur një raketë funksionale ndërkontinentale, siç është sigurimi që kokat bërthamore të mbijetojnë kushtet ekstreme të rikthimit në atmosferë. Të tjerë e kundërshtojnë këtë vlerësim, duke pasur parasysh vitet e gjata të investuara në programet bërthamore dhe raketore.
Koreja e Veriut ka shtuar përpjekjet për të zgjeruar arsenalin bërthamor që prej dështimit të diplomacisë së nivelit të lartë midis Kim dhe presidentit amerikan Donald Trump në vitin 2019. Në kongresin e Partisë së Punëtorëve në shkurt, Kim la të hapur mundësinë për dialog me Trump, por i bëri thirrje Uashingtonit të heqë dorë nga kërkesat për çarmatimin bërthamor si kusht paraprak për bisedime. /tema
