Kosova është paraqitur me fusnotë në Deklaratën për të Ardhmen Evropiane, të nënshkruar nga zyrtarët e Bashkimit Evropian, nga liderët e shteteve anëtare të BE-së, si dhe nga liderët e gjashtë shteteve të Ballkanit Perëndimor.
Bashkimi Evropian (BE), shtetet anëtare të BE-së dhe shtetet e Ballkanit Perëndimorpërmes një deklarate të përbashkët kanë konfirmuar në Samitin e Sofjes përkushtimin dhe vendosmërinë për të ardhmen evropiane të rajonit.
Deklarata shtatëmbëdhjetëpikëshe e Sofjes ka nxjerrë si përfundim edhe përkushtimin për thellimin e bashkëpunimit dhe rritjen e stabilitetit në rajon si parakusht për integrimin e kësaj pjese në Bashkimin Evropian.
“Konfirmojmë përkushtimin tonë të përbashkët për vlerat, për parimet evropiane dhe vizionin për një Evropë të fortë, të qëndrueshme dhe të bashkuar, duke u bazuar në lidhjet tona historike, kulturore, gjeografike dhe nga interesat tona të përbashkëta politike, të sigurisë dhe të ekonomisë”, thuhet në pikën e parë të Deklaratës së Përbashkët.
Në këtë deklaratë veç tjerash thuhet se BE-ja mbështet angazhimin e partnerëve të Ballkanit Perëndimor për të përforcuar më tutje marrëdhëniet fqinjësore të mira, qëndrueshmërinë rajonale dhe bashkëpunimin e ndërsjellë.
