Kryeministri i Greqisë, Kyriakos Mitsotakis, u zotua të shtojë më tej shpenzimet ushtarake të vendit mes tensioneve të vazhdueshme me Turqinsë lidhur me armatosjen që Athina e bën në ishujt e Detit Egje që duhet të kenë status joushtarak, transmeton Anadolu Agency (AA).
Gjatë një ceremonie të mbajtur dje për emërtimin e një anije të re raketore të sulmit të shpejtë të Marinës Greke, Mitsotakis tha se fuqizimi i forcave të armatosura të vendit do të jetë prioritet i qeverisë së tij konservatore-nacionaliste.
Duke iu referuar marrëveshjeve voluminoze të armëve të arritura së fundmi, duke përfshirë modernizimin e avionëve luftarakë F-16 të prodhimit amerikan dhe blerjen e fregatave të tipit FDI dhe avionëve luftarakë Rafael nga Franca, Mitsotakis tha se “çdo armë greke është një mjet parandalimi”.
Ai gjithashtu tha se blerjet e reja të armëve dhe rekrutimi për ushtrinë greke po bëhen përballë vështirësive të thella financiare.
Fjalimi i kryeministrit grek erdhi teksa qeveria e tij lufton kundër inflacionit rekord dhe rënies së fuqisë blerëse.
Inflacioni në vend aktualisht qëndron në mbi 11 për qind, niveli më i lartë prej tre dekadash.
Sipas entit grek të statistikave, ELSAT, çmimet e gazit natyror u rritën me 261,3 për qind në vit, çmimet e energjisë elektrike u rritën me 38,5 për qind, ndërkohë që çmimet e naftës për ngrohje me 65,1 për qind.
Dronët ushtarakë turq së fundmi regjistruan vendosjen e automjeteve të blinduara greke në ishujt Midilli (Lesvos) dhe Sisam (Samos), gjë që Ankaraja thotë se është në kundërshtim me ligjin ndërkombëtar. Pamjet u publikuan të dielën.
Siç njoftoi Ministria e Jashtme e Turqisë, të hënën u thirr ambasadori grek dhe u bë thirrje për t’i dhënë fund shkeljeve në ishujt e Egjeut dhe rivendosjen e statusit të tyre joushtarak.
Në një notë, Ministria tha se vendosja ishte një tjetër shkelje e detyrimeve të Greqisë sipas Traktatit të Lozanës të vitit 1923 dhe Traktatit të Parisit të vitit 1947, ku parashikohet që ishujt të çmilitarizohen. /aa
