Më shumë se 120 palestinezë janë vrarë brenda 24 orëve të fundit në Rripin e Gazës nga sulmet dhe të shtënat e ushtrisë izraelite, kanë raportuar burime mjekësore për Al Jazeera. Shumë prej viktimave ishin civilë të uritur që kërkonin ndihma ushqimore në pikat e shpërndarjes së ndihmave.
Ministria e Shëndetësisë në Gaza njoftoi se 57 persona janë vrarë dhe mbi 360 të tjerë janë plagosur që nga mëngjesi i së mërkurës, teksa tentonin të merrnin ndihma nga pikat e menaxhuara nga Fondacioni Humanitar i Gazës (GHF), një nismë e mbështetur nga SHBA dhe Izraeli.
Këto pika janë quajtur “thertore njerëzish”, pasi mbi 220 njerëz janë vrarë që nga fillimi i funksionimit të GHF më 27 maj. Ushtria izraelite ka pranuar se ka qëlluar “të shtëna paralajmëruese” në korridorin Netzarim, ku ndodhën shumë nga vrasjet.
Zyra e Medias e Qeverisë në Gaza akuzoi ushtrinë izraelite se po përdor qëllimisht urinë dhe kaosin për të destabilizuar Gazën dhe për të vrarë civilë në kërkim të ushqimit.
Organizatat ndërkombëtare, përfshirë OKB-në dhe UNRWA-n, kanë dënuar sistemin e ndihmës të GHF duke e cilësuar si joefikas dhe në shkelje të standardeve humanitare. UNRWA ka thënë se është e gatshme të shpërndajë ndihmat në mënyrë të sigurt dhe të organizuar, por është ndaluar nga autoritetet izraelite.
Ndërkohë, sulmet izraelite kanë vazhduar në të gjithë Gazën. Në lagjen Tuffah të Gazës janë vrarë të paktën shtatë persona, ndërsa në Jabalia, një sulm vrau dy fëmijë dhe një të rritur. Në kampin e refugjatëve në Nuseirat, tre persona u vranë nga një sulm me dron. Në Khan Younis, katër civilë, përfshirë një fëmijë, humbën jetën nga bombardimi i tendave të zhvendosurve.
Ministria e Shëndetësisë ka njoftuar se numri i përgjithshëm i të vrarëve nga lufta ka kaluar 55,000 që nga 7 tetori 2023, shumica gra dhe fëmijë.
Një zëdhënës i UNICEF-it deklaroi se “kjo është një luftë kundër fëmijëve”, duke përshkruar dëshmitë tronditëse nga spitali al-Shifa.
Në zhvillime të tjera, Izraeli vazhdon të mbajë në paraburgim aktivistë nga anija humanitare Madleen, e ndaluar në ujërat ndërkombëtare pranë Gazës. Katër prej tyre janë dëbuar, por tetë të tjerë, përfshirë eurodeputeten franceze Rima Hassan dhe aktivistin brazilian Thiago Avila, vazhdojnë të mbahen në burg. Disa janë vendosur në izolim, ndërsa organizata Adalah e ka quajtur arrestimin e tyre “të paligjshëm dhe arbitrar”.
OKB dhe të tjerë kanë bërë thirrje për lirimin e menjëhershëm të tyre dhe për rifillimin e misionit humanitar.
Lufta në Gaza vazhdon me pasoja shkatërruese për civilët, mes një krize të thellë humanitare dhe mungese të madhe ndihmash. /mesazhi
