Meksikë – Vritet gazetari i nëntë që nga fillimi i vitit 2022 – VIDEO

Një gazetar i njohur, i cili ishte rrëmbyer pranë shtëpisë së tij të mërkurën, është gjetur i vdekur, njoftoi sot zyra e prokurorit të shtetit të Sinaloas, në veriperëndim të Meksikës.

Luis Enrique Ramirez, 59 vjeç, është gazetari i nëntë i vrarë këtë vit në Meksikë, një nga vendet më të rrezikshme në botë për shtypin.

Ramirez, i cili kishte 40 vjet eksperiencë, ishte një kolumnist politik për gazetën kryesore “Sinaloa El Debate” dhe themelues i portalit të lajmeve “Fuentes Fidedignas”.

Gjatë karrierës së tij ai mori dhjetëra çmime gazetarie.

Guvernatori i Sinaloas, Ruben Rocha ka kërkuar një hetim të menjëhershëm nga zyra e prokurorit.

Shteti i Sinaloas është vendlindja e kartelit të drogës me të njëjtin emër, i cili drejtohej nga trafikanti i fuqishëm i drogës Joaquin “El Chapo” Guzman.

Aktualisht ai po vuan dënimin me burgim të përjetshëm në Shtetet e Bashkuara të Amerikës. /atsh