Ministria e Punëve të Jashtme e Palestinës ka deklaruar se shpërfillja e kauzës palestineze nga Izraeli kërcënon sigurinë dhe stabilitetin e rajonit dhe të botës, transmeton Anadolu.
Në një deklaratë me shkrim nga ministria thuhet se “Izraeli me krimet, shkeljet dhe praktikat qeveritare që kryen çdo ditë në territoret e Palestinës si dhe me ndarjen e një buxheti të madh për këto, po tregon përpjekje për shpërfilljen në nivel ndërkombëtar të çështjes palestineze”.
Kryeministri izraelit, Benjamin Netanyahu dhe zyrtarët e tjerë, shpërfillin nevojën për zgjidhjen e çështjes palestineze, thuhet në deklaratën ku bëhet e ditur se Izraeli tregon përpjekje kryesisht që përparësitë e politikës ndërkombëtare lidhur me Lindjen e Mesme të ripërcaktohen larg nga çështja palestineze.
“Shpërfillja e kauzës palestineze dhe e nevojave për zgjidhjen e saj nga Izraeli kërcënon sigurinë dhe stabilitetin e rajonit dhe të botës”, thuhet në deklaratën në të cilën vihet në dukje se çështja e Palestinës është arsyeja kryesore e konfliktit si dhe çelësi i sigurisë dhe stabilitetit në rajon.
