Rimac Nevera R, një version sportiv dhe më agresiv vizualisht i hipermakinës elektrike, ka fituar Çmimin Red Dot për Dizajnin e Produktit për vitin 2025.
Siç sugjeron edhe vetë emri, zhvillimi i Nevera R ndoqi filozofinë e markës Rimac: Radikale, Rebele, E Pamëshirshme, thotë kompania, duke theksuar vlerat e dizajnit të Nevera R, transmeton Telegrafi.
Dizajni i kësaj makine karakterizohet nga estetikë mbresëlënëse dhe një karakter i fortë sportiv, i projektuar për drejtim dhe kthesa emocionuese.
Pjesa e përparme e makinës me vija horizontale thekson efikasitetin aerodinamik, qëndrimin dhe gjerësinë e automjetit.
Nga ana, vihet re një raport i ekuilibruar i ngjyrës së karrocerisë dhe pjesëve të dukshme të karbonit, i cili thekson më tej profilin e përjetshëm dhe dinamik të makinës.
Krahu i madh i fiksuar i pasmë përfshin elementë të theksuar si një spojler i madh i fiksuar dhe një difuzor agresiv, ndërsa qëndrimi sportiv i makinës përforcohet më tej nga fellnet e pasme 21 inç dhe ato të përparme 20 inç.
“Ky çmim konfirmon vizionin e ekipit tonë për të krijuar jo vetëm një hipermakinë të përparuar teknologjikisht, por edhe një makinë që ofron kënaqësinë e drejtimit dhe pamjen e supermakinave klasike.
Me Nevera R, ne kemi bërë kalimin nga koncepti i balancuar Grand Tourer i Nevera origjinale në personalitetin më ekspresiv dhe agresiv të Nevera R”, tha Frank Heil, drejtor i dizajnit në Bugatti Rimac.
Çmimi Red Dot do t’i dorëzohet zyrtarisht Bugatti Rimac në eventin “Nata e Dizajnerëve” në muzeun e dizajnit Red Dot në Essen.
Nevera R do të paraqitet gjithashtu në Librin Vjetor të Dizajnit Red Dot, në faqen zyrtare të internetit të Red Dot dhe në ekspozita ndërkombëtare.
