Të paktën një person është vrarë dhe 28 të tjerë janë plagosur në një sulm ajror rus ndaj Kievit që filloi gjatë natës dhe zgjati deri të shtunën në mëngjes, sipas autoriteteve ukrainase, transmeton Anadolu.
Kryebashkiaku i Kievit, Vitaly Klitschko, tha në një deklaratë se të paktën 28 persona u plagosën, ndërsa 13 prej tyre u shtruan në spital.
Më herët, kreu i administratës ushtarake rajonale, Mykola Kalashnik, tha në Telegram se një grua u vra dhe dhjetë të tjerë, përfshirë dy fëmijë, u plagosën në rrethin Bila Tserkva si rezultat i sulmit.
Ndërkohë, mediat ukrainase raportuan se Rusia nisi një sulm të madh ajror gjatë natës, duke përdorur dronë dhe raketa.
Si pasojë, u dëmtuan ndërtesa shumëkatëshe dhe banesa private, një konvikt i një institucioni arsimor, si dhe objekte infrastrukturore në disa rrethe të Kievit.
Veçmas, presidenti ukrainas Volodymyr Zelenskyy tha në Telegram se gati 500 dronë, si dhe 40 raketa, përfshirë raketa hipersonike “Kinzhal”, u përdorën në sulm.
Sipas tij, infrastruktura energjetike dhe civile u dëmtua nga goditjet, ndërsa shërbimet e emergjencës po punojnë në disa zona, duke pastruar rrënojat dhe duke shuar zjarret.
Ndërkohë, Ministria ruse e Mbrojtjes konfirmoi se forcat e saj kryen sulmin ajror, duke pretenduar se ishte “një përgjigje ndaj sulmeve terroriste të Kievit” — përfshirë atë të së hënës, kur u vra në Moskë shefi i Drejtorisë së Trajnimit të Forcave, Fanil Sarvarov.
Sipas Shërbimit Federal të Sigurisë së Rusisë, autorët përdorën magnet për të vendosur bombë në makinën e tij, duke shkaktuar shpërthimin e saj, ndërsa disa tentativa të tjera vrasjeje u penguan.
“Në përgjigje të sulmeve terroriste të Ukrainës ndaj objektivave civile në territorin rus, u krye gjatë natës një sulm masiv nga Forcat e Armatosura të Federatës Ruse me armë tokësore, ajrore dhe detare me rreze të gjatë veprimi dhe saktësi të lartë, përfshirë raketa hipersonike ajrore ‘Kinzhal’, si dhe dronë”, thuhej në deklaratë.
Në deklaratë shtohet se sulmi kishte në shënjestër infrastrukturën energjetike që përdoret në interes të forcave ukrainase dhe ndërmarrjet e kompleksit ushtarako-industrial të Ukrainës.
Gjithashtu, u goditën vendndodhje për prodhimin e dronëve sulmues dhe pika të përkohshme dislokimi të trupave ukrainase dhe mercenarëve të huaj në 154 zona.
Verifikimi i pavarur i pretendimeve të të dyja palëve mbetet i vështirë për shkak të konfliktit në vazhdim.
