Një zyrtare e lartë humanitare e OKB-së ka paralajmëruar se Haiti po përballet me një nga krizat humanitare më “të rënda dhe që po përkeqësohen me shpejtësi” në Hemisferën Perëndimore, me më shumë se gjysmën e popullsisë që ka nevojë urgjente për ndihmë, transmeton Anadolu.
Gjatë një konference për media në New York pas një vizite të fundit në Haiti, Edem Wosornu, drejtoreshë e Divizionit për Reagim ndaj Krizave në Zyrën e OKB-së për Koordinimin e Çështjeve Humanitare, tha se 6.4 milionë njerëz kanë nevojë për ndihmë humanitare nga një popullsi prej rreth 12 milionë banorësh.
Ajo theksoi përkeqësimin e pasigurisë ushqimore, duke vënë në dukje se rreth 5.7 milionë njerëz në Haiti përballen me mungesë të theksuar ushqimi, me familje që po anashkalojnë vakte dhe fëmijë që po lënë shkollën për të ndihmuar familjet e tyre.
Vendi po përballet gjithashtu me atë që ajo e përshkroi si një “krizë mbrojtjeje në thellim”, e nxitur nga dhuna në rritje, zhvendosja masive dhe dhuna e përhapur me bazë gjinore.
Wosornu tha se rreth 1.45 milionë njerëz janë të zhvendosur brenda vendit, rreth 4 për qind e popullsisë, ndërsa pasiguria ka detyruar mbylljen e 1.600 shkollave, duke prekur rreth 250 mijë fëmijë.
“Shkolla ka shumë rëndësi për njerëzit e Haitit”, tha ajo, duke theksuar ndikimin afatgjatë të ndërprerjes së arsimit.
OKB-ja po kërkon 880 milionë dollarë për të ndihmuar 4.2 milionë njerëz këtë vit, përfshirë një plan prej 680 milionë dollarësh që synon 3.3 milionë nga më të cenueshmit.
Megjithatë, Wosornu theksoi se vetëm 27 për qind e fondeve të kërkuara u siguruan vitin e kaluar.
