Presidenti turk, Recep Tayyip Erdogan ka realizuar një bisedë telefonike me kryeministrin libian, Abdul Hamid Dbeibah, ku ka shprehur ngushëllimet e tij për rrëzimin e avionit në Turqi ku humbi jetën shefi i ushtrisë së Libisë, raporton Anadolu.
Drejtori i Komunikimit i Turqisë, Burhanettin Duran tha se Erdogan gjatë telefonatës shprehu “dhimbjen dhe ngushëllimet e tij” për humbjen e jetës në rrëzimin e avionit që transportonte shefin e Shtabit të Libisë, gjeneral Mohammed Ali Al-Haddad dhe ata që e shoqëronin atë.
Më herët, ministri turk i Punëve të Brendshme, Ali Yerlikaya tha se rrënojat e avionit të biznesit të tipit Falcon 50, i cili u ngrit nga aeroporti “Esenboga” i Ankarasë drejt Tripolit, u gjetën nga ekipet e xhandarmërisë rreth 2 kilometra në jug të fshatit Kesikkavak në qarkun Haymana.
Yerlikaya tha se kutia e zezë e avionit dhe regjistruesi i zërit në kabinën e pilotit u gjetën sot herët. Ai shtoi se procesi i ekzaminimit të këtyre pajisjeve për të përcaktuar shkakun e rrëzimit ka filluar.
Pas vdekjeve nga rrëzimi i avionit, qeveria e Unitetit Kombëtar të Libisë shpalli tre ditë zie kombëtare.
