Presidenti rus Vladimir Putin ka thënë se iniciativa e paraqitur nga udhëheqësit afrikanë mund të jetë baza për paqen në luftën e Moskës kundër Ukrainës, por pretendoi se sulmet nga Kievi e bënë ndërprerjen e armiqësive “praktikisht të pamundur”.
Udhëheqësi rus i bëri komentet në Moskë të shtunën pasi u takua me liderët nga Afrika në Shën Petersburg dhe dëgjoi thirrjet e tyre që Rusia të ecë përpara me planin e tyre.
Propozimi, sipas agjencisë së lajmeve Reuters, përmban një sërë hapash të mundshëm për të zbutur konfliktin, duke përfshirë tërheqje të trupave ruse, heqjen e armëve bërthamore taktike ruse nga Bjellorusia, pezullimin e një urdhër-arresti të Gjykatës Penale Ndërkombëtare (ICC) kundër Putinit dhe lehtësimin e sanksioneve.
Detajet e propozimit nuk janë bërë publike. /mesazhi
