Komandanti i Komandës Qendrore të SHBA-së (CENTCOM), admirali Brad Cooper, zhvilloi të mërkurën një bisedë telefonike me presidentin e Sirisë, Ahmad al-Sharaa, për të diskutuar respektimin e armëpushimit dhe bashkëpunimin për transferimin e të burgosurve të ISIS-it (DEASH), njoftoi CENTCOM-i, transmeton Anadolu.
Sipas një deklarate të zëdhënësit të CENTCOM-it, kapitenit Tim Hawkins, Cooper ka theksuar rëndësinë që qeveria siriane “t’i përmbahet armëpushimit” me grupin terrorist YPG/SDF.
“Cooper e informoi presidentin al-Sharaa për planin e CENTCOM-it për një transferim të rregullt dhe të sigurt të deri në 7.000 të burgosurve dhe shprehu pritshmëritë për forcat siriane, si dhe për të gjitha forcat e tjera, që të shmangin çdo veprim që mund të ndërhyjë”, thuhet në deklaratë.
“Udhëheqësit gjithashtu riafirmuan angazhimin e vazhdueshëm dhe të fortë për mposhtjen e qëndrueshme të ISIS-it në Siri. Parandalimi i një ringjalljeje të ISIS-it në Siri e bën Amerikën, rajonin dhe botën më të sigurt”, shtohet më tej.
CENTCOM-i kishte njoftuar më herët se kishte nisur një mision për transferimin e të burgosurve të ISIS-it nga Siria verilindore drejt Irakut, për të ndihmuar që terroristët të mbeten në qendra të sigurta arresti.
Qeveria siriane kishte njoftuar më herët një armëpushim katërditor me YPG/SDF-në, i cili hyri në fuqi të martën në mbrëmje, pas asaj që presidenca e përshkroi si “mirëkuptim të ndërsjellë” për të ardhmen e provincës Haseke.
Megjithatë, mediat shtetërore siriane raportuan se të paktën 11 ushtarë u vranë dhe më shumë se 25 u plagosën në ditën e parë të armëpushimit, duke akuzuar SDF-në për kryerjen e sulmeve me dronë, granatime artilerie dhe sulme tokësore ndaj pozicioneve të ushtrisë në provincat Haseke dhe Halep.
