Riadi shpall paketën e investimeve prej dy miliardë dollarësh
Arabia Saudite ka shpallur një paketë të madhe investimesh në Siri që përfshin energjinë, aviacionin, pasuritë e paluajtshme dhe telekomunikacionin, ndërsa pozicionohet si një mbështetëse kryesore e udhëheqjes së re të Sirisë.
Riadi ka krijuar një fond investimesh në Siri që do të ndajë 7.5 miliardë rialë sauditë (dy miliardë dollarë) për të zhvilluar dy aeroporte në Aleppo në faza të shumëfishta, tha të shtunën ministri i Investimeve i Arabisë Saudite Khalid al-Falih.
Fondi Elaf synon të financojë projekte në shkallë të gjerë në Siri me pjesëmarrjen e investitorëve të sektorit privat sauditë, shtoi Falih.
Në aviacionin civil, linja ajrore me kosto të ulët saudite Flynas dhe Autoriteti Sirian i Aviacionit Civil nënshkruan një marrëveshje për të krijuar një linjë të re ajrore, “Flynas Syria”.
Ndërmarrja e përbashkët do të jetë 51% në pronësi të palës siriane dhe 49% nga flynas. Pritet të fillojë operacionet në tremujorin e katërt të vitit 2026, tha kompania.
Kompania më e madhe e telekomunikacionit në Arabinë Saudite, STC, do të investojë gjithashtu më shumë se tre miliardë rialë (800 milionë dollarë) për të “forcuar infrastrukturën e telekomunikacionit dhe për të lidhur Sirinë në nivel rajonal dhe ndërkombëtar përmes një rrjeti me fibra optike që do të shtrihet mbi 4,500 kilometra”, sipas agjencisë shtetërore të lajmeve.
Investimet janë më të mëdhatë e njoftuara që kur Shtetet e Bashkuara hoqën sanksionet ndaj Sirisë në dhjetor, pasi Arabia Saudite ka mbështetur Presidentin Ahmed al-Sarrah që kur ai erdhi në pushtet në fund të vitit 2024 në krye të një koalicioni të fraksioneve opozitare islame pas rrëzimit të Presidentit Bashar al-Assad.
“Ne mirëpresim marrëveshjet e investimeve saudite-siriane të njoftuara këtë javë. Partneritetet strategjike në aviacion, infrastrukturë dhe telekomunikacion do të kontribuojnë ndjeshëm në përpjekjet për rindërtimin e Sirisë”, shkroi i dërguari i SHBA-së në Siri, Tom Barak, në X. /tesheshi
