Spanja dhe Sllovenia kanë kërkuar një armëpushim të menjëhershëm në Rripin e Gazës si dhe vendosjen e sanksioneve ndaj Izraelit. Këtë e bënë të ditur kryeministri spanjoll Pedro Sánchez dhe homologu i tij slloven Robert Golob gjatë një konference të përbashkët për shtyp të enjten në Madrid.
Sánchez deklaroi se të dy qeveritë mbështesin pezullimin e Marrëveshjes së Asocimit BE-Izrael, një embargo armësh dhe sanksione ndaj zyrtarëve të veçantë izraelitë.
Ai theksoi se Spanja dhe Sllovenia ndajnë një qëndrim të përbashkët përballë katastrofës humanitare që po përjeton populli palestinez. Sánchez kujtoi gjithashtu se njohja zyrtare e Shtetit të Palestinës, gati një vit më parë, u bë në bazë të angazhimit ndaj të drejtave të njeriut dhe ligjit ndërkombëtar.
“Zgjidhja me dy shtete mbetet e vetmja rrugë e mundshme – nuk ka alternativë tjetër,” tha ai.
Nga ana e tij, kryeministri slloven Robert Golob bëri thirrje për veprim të menjëhershëm dhe konfirmoi se Sllovenia do të vazhdojë të bashkëpunojë me Spanjën në mbrojtje të parimeve thelbësore të ligjit ndërkombëtar. Ai kërkoi armëpushim të menjëhershëm në Gaza dhe shpërndarje të shpejtë të ndihmës humanitare për popullatën. /mesazhi
