Kryeministri i Spanjës, Pedro Sanchez shprehu sot “solidaritet të plotë” me Danimarkën dhe Grenlandën, pas njoftimit të SHBA-së për një të dërguar special në ishull, transmeton Anadolu.
“Respektimi i sovranitetit dhe integritetit territorial është thelbësor për BE-në dhe për të gjitha vendet e botës. Siguria në Arktik është përparësi mbi të cilën ne kërkojmë të punojmë me aleatët dhe partnerët. Ne shprehim solidaritetin tonë të plotë me Danimarkën dhe popullin e Grenlandës”, shkroi Sanchez në platformën e kompanisë amerikane të mediave sociale X.
Më parë, presidenti i SHBA-së Donald Trump njoftoi se Jeff Landry, guvernatori i Luizianës, do të shërbejë si i dërguar special i SHBA-së në Grenlandë.
Trump shkroi në platformën e tij “Truth Social” se Landry e njeh “sa thelbësore është Grenlanda” për sigurinë kombëtare të SHBA-së dhe do të përparojë fuqishëm interesat e vendit për të garantuar sigurinë e aleatëve dhe botës në përgjithësi.
Grenlanda, një territor autonom nën sovranitetin danez, ka tërhequr interesin e SHBA-së për shkak të vendndodhjes së saj strategjike dhe burimeve të mëdha minerale. Trump më parë e përshkroi zotërimin e Grenlandës si “domosdoshmëri absolute” për sigurinë ekonomike të SHBA-së, duke e krahasuar atë me një “marrëveshje të madhe pasurish të patundshme”.
Si Danimarka ashtu edhe Grenlanda kanë hedhur poshtë çdo propozim për të shitur territorin, duke riafirmuar sovranitetin danez mbi ishullin.
