Dhjetëra civilë u vranë kur një sulm ajror ushtarak nigerian që synonte militantët e Boko Haram në verilindje të vendit goditi një treg lokal gjatë fundjavës, tha të hënën organizata ndërkombëtare për të drejtat e njeriut Amnesty International, transmeton Anadolu.
Më shumë se 100 persona u vranë dhe 35 u plagosën rëndë në sulmin i cili goditi fshatin Jilli të shtetit të quajtur Yobe – një zonë në qendër të një kryengritjeje të gjatë që përfshinte grupin Boko Haram, tha Amnesty.
Dëshmitarë okularë thanë se tre avionë ushtarakë qëlluan në një treg në fshat, shtoi organizata në një deklaratë të postuar në platformën amerikane të mediave sociale X.
“Një përdorim i tillë i pamatur i forcës vdekjeprurëse është i paligjshëm, skandaloz dhe nxjerr në pah shpërfilljen tronditëse të ushtrisë nigeriane për jetën e atyre që supozohet se ekziston për t’i mbrojtur”, shtoi organizata, duke kërkuar një zhvillim urgjent dhe të paanshëm.
Në reagim të këtij zhvillimi, Babagana Umara Zulum, guvernatori i shtetit Borno i cili është fqinj me shtetin Yobe, tha se tregu ishte i mbyllur zyrtarisht nga qeveria rreth pesë vjet më parë për shkak të përdorimit të tij si “një qendër logjistike nga terroristët dhe bashkëpunëtorët e tyre.”
Zulumi, i cili mbështeti operacionin ushtarak, tha se autoritetet kishin mbyllur më parë tregjet e Jillit dhe ato pranë tij, si pjesë e masave kundër kryengritjes.
Në një deklaratë të dielën, zëdhënësi i Forcave Ajrore Nigeriane, Sanni Uba, tha se operacioni pasoi misione të vazhdueshme inteligjence, mbikëqyrjeje dhe zbulimi që gjurmuan lëvizjet e terroristëve, duke përfshirë motoçikleta dhe kamionë me armë, që mblidheshin në zonë. Ai e përshkroi gjithashtu vendndodhjen si një enklavë të njohur për kryengritësit.
Në përgjigje të polemikave, Forcat Ajrore Nigeriane thanë se kishin nisur një hetim mbi akuzat për viktima civile, pasi incidenti nxjerr në pah sfidat e vazhdueshme me të cilat përballet ushtria e Nigerisë në operacionet e saj kundër kryengritjes, ku zonat civile shpesh ndodhen pranë vendeve të dyshuara si militante.
Nigeria ka luftuar terrorizmin në verilindje për më shumë se një dekadë, ku nga ky konflikt janë vrarë mijëra persona dhe janë zhvendosur miliona të tjerë në të gjithë rajonin e Liqenit Çad.
