Të paktën gjashtë palestinezë u vranë dhe disa të tjerë u plagosën të premten, pasi forcat izraelite bombarduan një shkollë të kthyer në strehë për të zhvendosurit në lagjen Tuffah të qytetit të Gazës.
Sipas burimeve lokale, predha tankesh izraelite goditën katin e dytë të ndërtesës në momentin kur familje palestineze ishin mbledhur për të festuar një dasmë.
Ky sulm vjen në kohën kur përfaqësues të Katarit, Egjiptit dhe Turqisë ndodhen në Shtetet e Bashkuara për bisedime lidhur me fazën e ardhshme të armëpushimit në Gaza. Sipas autoriteteve të Gazës, që nga hyrja në fuqi e marrëveshjes së armëpushimit të ndërmjetësuar nga SHBA në tetor, Izraeli ka kryer qindra shkelje të saj.
Sekretari amerikan i Shtetit, Marco Rubio, konfirmoi se në bisedime po marrin pjesë përfaqësues të Katarit, Turqisë, Egjiptit dhe Emirateve të Bashkuara Arabe. Ai theksoi se prioritet i SHBA-së është përfundimi i fazës së parë të armëpushimit dhe krijimi i mekanizmave për qeverisjen dhe sigurinë në Gaza.
Ndërkohë, media izraelite raportojnë se kryeministri Benjamin Netanyahu po zhvillon konsultime të ngushta sigurie për fazën e dytë të armëpushimit dhe skenarët e mundshëm, përfshirë edhe rifillimin e operacioneve ushtarake në Gaza. /mesazhi
