Presidenti i SHBA-së, Donald Trump, po pret në Shtëpinë e Bardhë kryeministrin izraelit, Benjamin Netanyahu, për bisedime me dyer të mbyllura, të cilat pritet të përqendrohen kryesisht në raundin e ardhshëm të negociatave me Iranin, transmeton Anadolu.
Një zyrtar i Shtëpisë së Bardhë konfirmoi se takimi në Zyrën Ovale ka nisur. Mbetet e paqartë nëse gazetarët do të lejohen të marrin pjesë në përfundim të takimit apo nëse ai do të mbetet plotësisht i mbyllur për median.
Autokolona e Netanyahut u pa më herët nga gazetarët teksa i afrohej Shtëpisë së Bardhë nga një rrugë ngjitur me masa të rrepta sigurie.
Dje, Netanyahu zhvilloi një takim privat me zyrtarë të lartë amerikanë që udhëheqin negociatat me Iranin, disa orë pas mbërritjes së tij në Washington.
Ndër pjesëmarrësit në diskutime ishin i dërguari i posaçem Steve Witkoff dhe Jared Kushner, dhëndri i Trumpit dhe këshilltar jozyrtar. Ata janë negociatorë kyç në bisedimet në vazhdim me Iranin. Javën e kaluar, ata zhvilluan raundin e parë të negociatave me Iranin në Oman.
Sot më herët, Netanyahu u bë anëtar i Bordit të Paqes të Trumpit gjatë një takimi me dyer të mbyllura me sekretarin e Shtetit, Marco Rubio, në Blair House, rezidenca zyrtare e mysafirëve e presidentit amerikan.
Më 22 janar, përfaqësues të 19 vendeve nënshkruan Kartën e Bordit të Paqes në margjinat e Forumit Ekonomik Botëror në Davos të Zvicrës.
Bordi i Paqes u krijua në kuadër të përpjekjeve për zgjidhje paqësore në Rripin e Gazës. Washingtoni ka bërë të ditur se që atëherë nismës i janë bashkuar edhe shtete të tjera.
Takimi i parë është planifikuar të mbahet në Washington dhe pritet të zhvillohet më 19 shkurt në nivel liderësh. Nuk është e qartë nëse Netanyahu do të marrë pjesë. Mbledhja e fondeve për rindërtimin e Gazës pritet të jetë tema qendrore e takimit.
