Turqia ka premtuar të jetë zëri i botës myslimane dhe të mbrojë drejtësinë globale, ndërsa dënoi ashpër agresionin rajonal të Izraelit në samitin e Organizatës së Bashkëpunimit Islamik (OIC) që po zhvillohet në Stamboll.
Gjatë sesionit të 51-të të Këshillit të Ministrave të Jashtëm të OBI-së, ministri i jashtëm turk Hakan Fidan tha se Turqia, gjatë presidencës së saj në OBI, “do të fuqizojë zërin e botës myslimane, do të vërë në qendër vendosjen e drejtësisë globale dhe do të qëndrojë fort kundër shtypjes”.
Në një kohë kur sulmet e Izraelit ndaj Gazës dhe Iranit vazhdojnë, Stambolli po pret një nga takimet më të rëndësishme ndërkombëtare, duke tërhequr vëmendjen globale.
“Izraeli tani po sulmon fqinjin tonë Iranin, duke e shtyrë rajonin drejt një katastrofe të plotë,” tha Fidan.
Ai theksoi se çështja e agresionit izraelit “nuk është një problem vetëm i Palestinës, apo i Libanit, Sirisë, Jemenit apo Iranit. Kjo është një çështje që lidhet drejtpërdrejt me Izraelin.”
Armiqësitë shpërthyen më 13 qershor, kur Izraeli nisi sulme ajrore ndaj disa objekteve ushtarake dhe bërthamore në Iran, çka solli si kundërpërgjigje sulme raketore nga Teherani.
Autoritetet izraelite raportojnë se deri më tani, nga sulmet iraniane janë vrarë të paktën 25 persona dhe janë plagosur qindra të tjerë. Nga ana tjetër, sipas Ministrisë së Shëndetësisë së Iranit, në sulmet izraelite janë vrarë 430 persona dhe janë plagosur mbi 3,500 të tjerë. /mesazhi
