Unioni Afrikan ka përshëndetur një nismë pesëpikëshe të propozuar nga Kina dhe Pakistani për uljen e tensioneve në Gjirin Persik dhe Lindjen e Mesme.
Kryetari i Komisionit të AU-së, Mahmoud Ali Youssouf, deklaroi se plani – i cili përfshin armëpushim të menjëhershëm, mbrojtjen e civilëve dhe sigurinë detare – mund të ndihmojë në orientimin e krizës drejt një zgjidhjeje të negociuar.
Ai e cilësoi nismën si një kontribut “të duhur dhe konstruktiv” në përpjekjet ndërkombëtare për uljen e tensioneve, duke bërë thirrje për përmbajtje dhe respektim të së drejtës ndërkombëtare.
Unioni paralajmëroi se konflikti në vazhdim, i lidhur me përplasjen mes SHBA e Izraelit kundër Iranit, po ndikon tashmë në zinxhirët globalë të energjisë, furnizimin me ushqim dhe stabilitetin ekonomik, me vendet afrikane veçanërisht të ekspozuara ndaj pasojave.
Plani pesëpikësh i propozuar nga Kina dhe Pakistani përfshin ndalimin e menjëhershëm të luftimeve, nisjen sa më të shpejtë të bisedimeve për paqe, mbrojtjen e objektivave joushtarake, sigurinë e rrugëve detare dhe respektimin e Kombeve të Bashkuara.
Unioni Afrikan theksoi se një zgjidhje e qëndrueshme mund të arrihet vetëm përmes dialogut dhe diplomacisë, duke shtuar se është i gatshëm të bashkëpunojë me partnerë ndërkombëtarë dhe rajonalë për të promovuar paqen dhe stabilitetin në rajon. /mesazhi
