Presidenti ukrainas, Volodymyr Zelenskyy mbërriti sot në Gjermani për të marrë pjesë në edicionin e vitit 2026 të Konferencës së Sigurisë në Mynih. Forum treditor filloi më herët gjatë ditës, transmeton Anadolu.
“Sot në Mynih, Gjermani. Një ditë e rëndësishme, dhe do të ketë hapa të rinj drejt sigurisë sonë të përbashkët – të Ukrainës dhe Evropës”, shkroi Zelenskyy në rrjetin social amerikan X, së bashku me një video të mbërritjes së tij në vend.
Ai tha se në agjendën e vizitës së tij janë ndërmarrja e parë e përbashkët ukraino-gjermane për prodhimin e dronëve, si dhe takime bilaterale dhe multilaterale me partnerët e Kievit.
Ai theksoi nevojën për “më shumë prodhim të përbashkët, më shumë rezistencë, më shumë koordinim dhe efikasitet të arkitekturës sonë të përbashkët të sigurisë në Evropë”.
“Gjëja më e rëndësishme që mund të arrijmë së bashku është përfundimi i luftës me një paqe dinjitoze dhe krijimi i garancive të besueshme të sigurisë për Ukrainën dhe për gjithë Evropën – në mënyrë që askush në Evropë të mos ketë frikë se do të mbetet pa mbrojtje”, shtoi ai.
Konferenca po mbledh mbi 1.000 pjesëmarrës nga më shumë se 115 vende. Presidenti ukrainas pritet të marrë pjesë në një panel diskutimi në ngjarje të shtunën, me temë: “Koalicioni i të aftëve? Sigurimi i mbështetjes afatgjate për Ukrainën”.
