Aeroportet dhe linjat ajrore në mbarë Evropën të premten kërkuan fleksibilitet të menjëhershëm në zbatimin e sistemit të ri të hyrjes dhe daljes të BE-së (EES), pas “ndërprerjeve të konsiderueshme” në ditën e parë të funksionimit të plotë, transmeton Anadolu.
Në një deklaratë të përbashkët, Këshilli Ndërkombëtar i Aeroporteve për Evropën (ACI) dhe Linjat Ajrore për Evropën (A4E) thanë se pasagjerët u përballën me vonesa të gjata, humbje fluturimesh dhe sfida operacionale pasi sistemi u bë plotësisht i detyrueshëm.
EES, i prezantuar nga Komisioni Evropian, regjistron në mënyrë digjitale hyrjen dhe daljen e udhëtarëve jashtë BE-së, duke zëvendësuar vulosjen tradicionale të pasaportave në të gjithë zonën Shengen.
Sipas deklaratës, pasagjerët përjetuan kohë pritjeje deri në dy deri në tre orë në kontrollin kufitar gjatë periudhave të ngarkuara, pavarësisht se autoritetet zbatuan masa të pjesshme pezullimi që lejojnë anashkalimin e mbledhjes së të dhënave biometrike.
Linjat ajrore gjithashtu raportuan ndërprerje të konsiderueshme në oraret e fluturimeve. Në një rast, një fluturim drejt Mbretërisë së Bashkuar u nis pa 51 pasagjerë që u vonuan në kontrollet kufitare.
Një fluturim tjetër nuk kishte asnjë pasagjer në momentin e imbarkimit, ndërsa vetëm 12 mbërritën në portë 90 minuta më vonë.
Drejtori i përgjithshëm i ACI-t, Olivier Jankovec dhe drejtoresha menaxhuese e A4E-së, Ourania Georgoutsakou, paralajmëruan se situata nxjerr në pah nevojën urgjente për fleksibilitet më të madh operacional, duke shtuar se masa të tilla do të jenë thelbësore në javët në vijim dhe gjatë sezonit të ngarkuar veror të udhëtimeve.
Sistemi EES, i cili filloi zbatimin gradual në tetor të vitit 2025 në 29 vende evropiane, u bë zyrtarisht plotësisht funksional sot, duke shënuar një ndryshim të madh në procedurat e kontrollit kufitar për vizitorët afatshkurtër nga vendet jashtë BE-së.
