Policia britanike arrestoi 86 persona nën dyshimin për shkelje të rëndë të pronës, pasi protestuesit hynë në territorin e një burgu në perëndim të Londrës gjatë një demonstrate në mbështetje të një aktivisti të grupit “Palestine Action”, njoftuan autoritetet të dielën, transmeton Anadolu.
Policia Metropolitane tha se arrestimet u kryen të shtunën në mbrëmje jashtë burgut “HMP Wormwood Scrubs”, ku demonstruesit u mblodhën për të protestuar kundër ndalimit të një të burgosuri që raportohet se ndodhet në grevë urie.
Sipas policisë, grupi refuzoi të largohej pasi u urdhërua, pengoi stafin e burgut të hynte dhe të dilte nga objekti dhe bëri kërcënime ndaj oficerëve. Autoritetet shtuan se disa protestues arritën të hynin edhe në një zonë hyrjeje për stafin të një prej godinave të burgut.
Një zëdhënës i Ministrisë së Drejtësisë e përshkroi incidentin si “thellësisht shqetësues”, raportoi “The Independent”.
“Ndërsa ne mbështesim të drejtën për protestë paqësore, raportet për shkelje të territorit dhe kërcënime ndaj stafit dhe oficerëve të policisë janë thellësisht shqetësuese”, tha zëdhënësi, duke shtuar se siguria e burgut nuk u cenua.
Ministria tha se të burgosurit po menaxhohen në përputhje me politikat ekzistuese, përfshirë kontrolle të rregullta mjekësore dhe monitorim nga profesionistë të shëndetësisë.
Pamje të shpërndara në rrjetet sociale treguan demonstrues që brohorisnin jashtë burgut, me disa prej tyre që mbanin pankarta.
Protesta u mbajt në mbështetje të Umer Khalid, i cili nga grupi përshkruhet si pjesëmarrësi i fundit i mbetur në fushatën e grevës së urisë “Të burgosurit për Palestinën”.
Autoritetet thanë se hetimet po vazhdojnë.
